જયપુર : ભારતીય સેનાએ આજે 'આર્મી ડે' (સેના દિવસ) ના પવિત્ર અવસરે પાકિસ્તાન અને દુનિયાના આતંકવાદી સંગઠનોને હચમચાવી દેતો એક વિડીયો જાહેર કર્યો છે. આ વિડીયોમાં ગયા વર્ષે મે મહિનામાં હાથ ધરવામાં આવેલા 'ઓપરેશન સિંદૂર' (Operation Sindoor) ના તે અદ્રશ્ય દ્રશ્યો બતાવવામાં આવ્યા છે, જેમાં ભારતીય જવાનોએ સરહદ પાર જઈને પાકિસ્તાની એરબેઝ, એર ડિફેન્સ રડાર અને આતંકી છાવણીઓને ધૂળ ચાટતી કરી દીધી હતી.
પહેલગામ હુમલાનો લેવાયો હતો 'લોહીનો બદલો'
ઓપરેશન સિંદૂરની શરૂઆત પાકિસ્તાન પ્રેરિત આતંકવાદીઓના કાયરતાપૂર્ણ કૃત્ય બાદ થઈ હતી. પહેલગામમાં આતંકીઓએ નિર્દોષ લોકોને તેમનો ધર્મ પૂછીને ૨૬ નાગરિકોની નિર્મમ હત્યા કરી હતી. આ હુમલો ભારતની શાંતિ અને કોમી એકતાને ડહોળવાનો પ્રયાસ હતો. જેના જવાબમાં ૭ મે, ૨૦૨૫ ની મધ્યરાત્રિએ ભારતીય સેનાએ સર્જિકલ સ્ટ્રાઈક કરતા નવ મોટા આતંકી ઠેકાણાઓ પર તાબડતોબ હુમલા કર્યા અને ૧૦૦ થી વધુ આતંકીઓને મોતને ઘાટ ઉતારી દીધા હતા.
પાકિસ્તાની એરબેઝ અને રડાર સિસ્ટમનો સફાયો
જ્યારે પાકિસ્તાને ભારતીય રહેણાંક વિસ્તારોમાં ડ્રોન મોકલીને બદલો લેવાની કોશિશ કરી, ત્યારે ભારતે વળતો પ્રહાર કરીને પાકિસ્તાનના રક્ષણાત્મક માળખાને જ તોડી પાડ્યું હતું. નવા જાહેર થયેલા વિડીયોમાં સ્પષ્ટ જોઈ શકાય છે કે કેવી રીતે ભારતીય મિસાઈલો અને સચોટ હવાઈ હુમલાઓએ સરહદ પારના રડાર સ્ટેશનો અને મુખ્ય હવાઈ મથકોને નિશાન બનાવ્યા હતા. આ હુમલા એટલા સચોટ હતા કે પાકિસ્તાનનું એર ડિફેન્સ તેને રોકવામાં નિષ્ફળ રહ્યું હતું.
"કાયરતાની કિંમત ચૂકવવી પડશે"
ત્રણ મિનિટના આ વિડીયોની શરૂઆત ૨૦૦૧ના સંસદ હુમલાથી લઈને ૨૦૧૯ના પુલવામા હુમલા સુધીની ઘટનાઓની યાદી સાથે થાય છે, જેને સેનાએ 'માનવતા પરના હુમલા' ગણાવ્યા છે. વિડીયોના અંતે સેનાએ દુશ્મનોને સ્પષ્ટ શબ્દોમાં ચેતવણી આપી છે કે, "દરેક કાયરતાપૂર્ણ હુમલા માટે ભારે કિંમત ચૂકવવી પડશે." સેના પ્રમુખ જનરલ ઉપેન્દ્ર દ્વિવેદીએ પણ આ ઓપરેશન પર ગર્વ વ્યક્ત કરતા જણાવ્યું કે ભારતીય દળો ગમે તેવા કપરા સંજોગોમાં ગ્રાઉન્ડ ઓપરેશન માટે તૈયાર છે.