નવી દિલ્હી : ભારત હવે માત્ર ટેકનોલોજી વાપરનારો દેશ નથી રહ્યો, પણ દુનિયાને નવી દિશા આપનારો દેશ બની ગયો છે. વડાપ્રધાન નરેન્દ્ર મોદીએ આજે સોશિયલ મીડિયા પર લોકસભા અધ્યક્ષ ઓમ બિરલા દ્વારા લખાયેલો એક વિશેષ લેખ શેર કર્યો છે. આ લેખમાં ભારત કેવી રીતે કોમનવેલ્થ દેશોના સમુદાય સાથે પોતાની મજબૂત 'ડિજિટલ પબ્લિક ઇન્ફ્રાસ્ટ્રક્ચર' (DPI) શેર કરવા તૈયાર છે, તેનું સચોટ ચિત્ર રજૂ કરવામાં આવ્યું છે. પીએમ મોદીએ આ લેખ દ્વારા સંદેશ આપ્યો છે કે ભારતની ટેકનોલોજીકલ પ્રગતિ સમગ્ર માનવજાતના કલ્યાણ માટે છે.
ટેકનોલોજી એ માલિકી નહીં, પણ જાહેર સંપત્તિ
નવી દિલ્હીમાં અત્યારે કોમનવેલ્થ દેશોના સ્પીકર્સ અને પ્રિસાઇડિંગ ઓફિસર્સની ૨૮મી પરિષદ ચાલી રહી છે. આ તકે ઓમ બિરલાએ પોતાના લેખમાં નોંધ્યું છે કે, ભારત ટેકનોલોજીને કોઈ એક દેશની ખાનગી મિલકત તરીકે નહીં, પરંતુ 'જાહેર હિત' (Public Good) તરીકે જુએ છે. ભારત ઈચ્છે છે કે યુપીઆઈ (UPI), આધાર અને અન્ય ડિજિટલ માળખાગત સુવિધાઓ જે રીતે ભારતના સામાન્ય નાગરિકનું જીવન બદલી રહી છે, તે જ રીતે તે અન્ય કોમનવેલ્થ દેશોમાં પણ લોકશાહીને મજબૂત બનાવે અને પારદર્શિતા લાવે.
'વસુધૈવ કુટુંબકમ'ની ભાવનાનું પ્રતિબિંબ
વડાપ્રધાને પોતાની પોસ્ટમાં ભાર મૂક્યો હતો કે આ પહેલ ભારતની પ્રાચીન સંસ્કૃતિના મંત્ર 'વસુધૈવ કુટુંબકમ' (સમગ્ર વિશ્વ એક પરિવાર છે) પ્રત્યેની પ્રતિબદ્ધતાને દર્શાવે છે. ભારત આ તમામ ટેકનિકલ સાધનો અન્ય દેશોને આપવા માટે તત્પર છે જેથી ત્યાંની લોકશાહી વધુ સ્થિતિસ્થાપક અને સશક્ત બને. આ પગલું ખાસ કરીને આફ્રિકન અને એશિયન દેશો માટે વરદાન સાબિત થઈ શકે છે જેઓ હજુ ડિજિટલ ક્રાંતિના પ્રારંભિક તબક્કામાં છે.