ઇસ્લામાબાદ: પાકિસ્તાનની ડગમગતી અર્થવ્યવસ્થા વચ્ચે એક એવો કરાર થયો છે જેણે વૈશ્વિક સ્તરે સૌને ચોંકાવી દીધા છે. અમેરિકી રાષ્ટ્રપતિ ડોનાલ્ડ ટ્રમ્પના પરિવારની માલિકીની ક્રિપ્ટો કંપની, વર્લ્ડ લિબર્ટી ફાઇનાન્શિયલ (WLF) અને તેની સાથી કંપની SC ફાઇનાન્શિયલ ટેક્નોલોજીસ એ 14 જાન્યુઆરી, 2026 ના રોજ પાકિસ્તાન સાથે સત્તાવાર સમજૂતી કરાર (MoU) પર હસ્તાક્ષર કર્યા છે. આ સોદો કેટલો હાઈ-પ્રોફાઈલ છે તેનો અંદાજ એ વાત પરથી લગાવી શકાય છે કે હસ્તાક્ષર સમયે પાકિસ્તાનના વડાપ્રધાન શાહબાઝ શરીફ અને આર્મી ચીફ જનરલ અસીમ મુનીર પોતે હાજર રહ્યા હતા. આ કરાર મુજબ, ટ્રમ્પની કંપનીનો USD1 સ્ટેબલકોઈન (જેનું મૂલ્ય અમેરિકી ડોલર સાથે જોડાયેલું રહે છે) હવે પાકિસ્તાનના ડિજિટલ પેમેન્ટ માળખામાં સામેલ કરવામાં આવશે.

ટ્રમ્પ પરિવાર માટે આ સોદો જેકપોટ સાબિત થઈ રહ્યો છે. આંકડાઓ મુજબ, ડિસેમ્બર 2025 સુધીમાં આ ક્રિપ્ટો સાહસમાંથી ટ્રમ્પ પરિવારે $1 બિલિયનનો (આશરે ₹8,300 કરોડથી વધુ) ચોખ્ખો નફો કરી લીધો છે, જ્યારે હજુ $3 બિલિયન જેટલો સંભવિત નફો લાઈનમાં છે. પાકિસ્તાન માટે આ કરારનો મુખ્ય ઉદ્દેશ્ય વિદેશથી આવતા અબજો ડોલરના રેમિટન્સને સરળ બનાવવાનો છે. પાકિસ્તાનમાં દર વર્ષે આશરે $30 બિલિયનથી વધુ રકમ વિદેશી પાકિસ્તાનીઓ દ્વારા મોકલવામાં આવે છે. હવે ટ્રમ્પના આ સ્ટેબલકોઈન દ્વારા આ વ્યવહારો ઓછા ખર્ચે અને વીજળીની ઝડપે થઈ શકશે, જે પાકિસ્તાનની સેન્ટ્રલ બેંકના ડિજિટલ ઇન્ફ્રાસ્ટ્રક્ચર સાથે સીધું જોડાયેલું હશે.

જોકે, આ મામલે ગંભીર નૈતિક પ્રશ્નો પણ ઉભા થયા છે. એક તરફ ડોનાલ્ડ ટ્રમ્પ અમેરિકાના રાષ્ટ્રપતિ તરીકે ક્રિપ્ટોકરન્સી માટે અનુકૂળ કાયદાઓ બનાવી રહ્યા છે, તો બીજી તરફ તેમની પોતાની જ કંપનીઓ તે કાયદાઓનો લાભ લઈને વિદેશી સરકારો સાથે અબજોના સોદા કરી રહી છે. નિષ્ણાતો આને સીધો 'હિતોનો સંઘર્ષ' ગણાવી રહ્યા છે. પાકિસ્તાને પણ આ દિશામાં તૈયારીઓ તેજ કરી છે અને માર્ચ 2025 માં જ 'પાકિસ્તાન ક્રિપ્ટો કાઉન્સિલ'ની સ્થાપના કરી હતી. હવે જ્યારે ટ્રમ્પની કંપની પાકિસ્તાની બજારમાં સત્તાવાર રીતે પ્રવેશી છે, ત્યારે જોવાનું એ રહેશે કે આ 'ક્રિપ્ટો ડિપ્લોમસી' પાકિસ્તાનની તિજોરી ભરે છે કે પછી માત્ર ટ્રમ્પ પરિવારના નફામાં જ વધારો કરે છે.