મુંબઈ : મહારાષ્ટ્રમાં અત્યારે મ્યુનિસિપલ કોર્પોરેશનની ચૂંટણીઓ માટે મતદાનની પ્રક્રિયા ચાલી રહી છે, પરંતુ તેની વચ્ચે જ એક મોટો વિવાદ ઊભો થયો છે. સામાન્ય રીતે જે શાહી મતદાન બાદ આંગળી પર લગાવવામાં આવે છે તે અઠવાડિયા સુધી ભૂંસાતી નથી, પરંતુ મુંબઈ અને આસપાસના વિસ્તારોમાં આ શાહી માર્કર પેનથી લગાવવામાં આવતા તે તરત જ નીકળી જતી હોવાની વ્યાપક ફરિયાદો ઉઠી છે. મહારાષ્ટ્ર નવનિર્માણ સેના (MNS) એ આ બાબતને લઈને રાજ્ય ચૂંટણી પંચ પર આકરા પ્રહારો કર્યા છે.
કલ્યાણ બેઠક પરથી MNS ના ઉમેદવાર ઉર્મિલા તાંબેએ આ મુદ્દે અવાજ ઉઠાવતા જણાવ્યું હતું કે, ચૂંટણી પંચ જાણીજોઈને નબળી ગુણવત્તાવાળી શાહીનો ઉપયોગ કરી રહ્યું છે. તેમણે આક્ષેપ કર્યો હતો કે આ બધું સત્તાધારી પક્ષને ફાયદો પહોંચાડવા માટે કરવામાં આવી રહ્યું છે, જેથી એક જ વ્યક્તિ વારંવાર મતદાન કરી શકે અને બોગસ વોટિંગનો ખતરો વધી જાય. આ ઘટનાને પગલે વિરોધ પક્ષોએ પણ ચૂંટણીની પારદર્શિતા પર સવાલો ઉઠાવ્યા છે.
આ વિવાદ વધતા જ MNS પ્રમુખ રાજ ઠાકરેએ મહારાષ્ટ્રની જનતાને સાવધ રહેવા અને આવી કોઈ પણ ગેરરીતિ જણાય તો તુરંત અવાજ ઉઠાવવા અપીલ કરી છે. સોશિયલ મીડિયા પર અનેક મતદારોએ વીડિયો શેર કર્યા છે જેમાં તેઓ આંગળી પર લાગેલી શાહીને સાબુ કે પાણીથી સરળતાથી સાફ કરતા જોવા મળી રહ્યા છે. ચૂંટણી પંચે આ મામલે તપાસની ખાતરી આપી છે, પરંતુ મતદાન પ્રક્રિયા દરમિયાન સર્જાયેલા આ છબરડાએ તંત્રની કામગીરી પર મોટું પ્રશ્નાર્થ ચિન્હ લગાવી દીધું છે.
 બીજી તરફ, રાજ્ય ચૂંટણી પંચ (SEC) ના અધિકારીઓએ જણાવ્યું હતું કે તેઓ પરિસ્થિતિ પર નજર રાખી રહ્યા છે. જોકે, વિપક્ષના નેતાઓએ માંગ કરી છે કે જો શાહી ભૂંસાઈ જતી હોય તો મતદાન તાત્કાલિક અટકાવવું જોઈએ અથવા વૈકલ્પિક વ્યવસ્થા કરવી જોઈએ. મુંબઈ અને કલ્યાણ-ડોમ્બિવલી જેવા મહત્ત્વના વિસ્તારોમાં આ વિવાદને કારણે મતદાન કેન્દ્રો પર પણ ભારે ઘર્ષણના દ્રશ્યો જોવા મળ્યા છે.