નવી દિલ્હી: રાજધાની દિલ્હી અને એનસીઆરના વિસ્તારોમાં આજે ૧૬ જાન્યુઆરીના રોજ શુક્રવારની સવારે હાડ થીજવતી ઠંડી અને ગાઢ ધુમ્મસ જોવા મળ્યું હતું. હવામાન વિભાગના જણાવ્યા અનુસાર, પાલમ ખાતે સવારે ૭:૩૦ વાગ્યે વિઝિબિલિટી ઘટીને ૧૫૦ મીટર થઈ ગઈ હતી, જેના કારણે જનજીવન અને વાહનવ્યવહાર પર માઠી અસર પડી છે. 

ઠંડી અને ધુમ્મસના કારણે દિલ્હી આવતી અનેક ટ્રેનો મોડી ચાલી રહી છે અને ઘણી ફ્લાઈટ્સ (ઉડાન) પણ વિલંબિત થઈ છે.

સફદરજંગ વેધશાળામાં લઘુત્તમ તાપમાન ૨.૯ ડિગ્રી સેલ્સિયસ નોંધાયું હતું, જે જાન્યુઆરી ૨૦૨૩ પછીનું સૌથી નીચું તાપમાન છે, જ્યારે પાલમમાં પારો ૨.૩ ડિગ્રી સુધી ગગડી ગયો હતો, જે ૨૦૧૦ પછીનો સૌથી નીચલો સ્તર છે. 

ઠંડીની સાથે પ્રદૂષણે પણ માઝા મૂકી છે; દિલ્હીના ચાંદની ચોકમાં ૩૭૦ અને ગાઝિયાબાદના લોની વિસ્તારમાં એક્યુઆઈ ૪૧૦ જેટલો ગંભીર નોંધાયો છે. આ કડકડતી ઠંડી વચ્ચે પણ દિલ્હીના કર્તવ્ય પથ પર પ્રજાસત્તાક દિવસની પરેડની રિહર્સલ ચાલુ રહી હતી.