કોલકાતા:  પશ્ચિમ બંગાળની રાજધાની કોલકાતામાં એન્ફોર્સમેન્ટ ડિરેક્ટોરેટ (ED) એ બેંક છેતરપિંડીના એક હાઈ-પ્રોફાઈલ કેસમાં મોટી સફળતા મેળવી છે. ‘શ્રી ગણેશ જ્વેલરી હાઉસ’ સાથે સંકળાયેલા ₹૨,૬૭૨ કરોડના મની લોન્ડરિંગ કેસમાં પ્રત્યુષ કુમાર સુરેકાની ધરપકડ કરવામાં આવી છે. લાંબા સમયથી તપાસ એજન્સીને હાથતાળી આપી રહેલો સુરેકા ૫ જાન્યુઆરી, ૨૦૨૬ના રોજ કોલકાતા એરપોર્ટ પરથી થાઈલેન્ડ ભાગી જવાની કોશિશ કરી રહ્યો હતો, ત્યારે જ લુકઆઉટ પરિપત્ર (LOC) ના આધારે તેને અટકાવી દેવાયો હતો. વારંવાર સમન્સ છતાં તપાસમાં સહકાર ન આપતા અને પુરાવા સાથે છેડછાડની આશંકાને પગલે EDએ આખરે તેની ધરપકડ કરી કાયદેસરની કાર્યવાહી હાથ ધરી છે.

આ કૌભાંડની તપાસમાં ચોંકાવનારા ખુલાસા થયા છે. ૨૦૧૧-૧૨ દરમિયાન જ્વેલરીના વ્યવસાય માટે ૨૫ બેંકોના કન્સોર્ટિયમ પાસેથી કરોડોની લોન લેવામાં આવી હતી, પરંતુ આ રકમનો ઉપયોગ ધંધામાં કરવાને બદલે ગેરકાયદેસર રીતે સોલાર એનર્જી પ્રોજેક્ટ્સમાં ટ્રાન્સફર કરી દેવાયો હતો. પ્રત્યુષ સુરેકા જે કંપનીમાં મેનેજિંગ ડિરેક્ટર હતો, તે ‘એલેક્સ એસ્ટ્રલ પાવર’ દ્વારા બનાવટી કરારો અને ડમી ડિરેક્ટરોની નિમણૂક કરીને બેંકો સાથે વિશ્વાસઘાત કરવામાં આવ્યો હતો. આશરે ₹૪૦૦ કરોડના સોલાર પ્રોજેક્ટ્સમાં બેંક ફાઇનાન્સ અને ઇક્વિટીના નામે થયેલા વ્યવહારો માત્ર કાગળ પરના 'પરિપત્ર વ્યવહારો' (Circular Transactions) હોવાનું બહાર આવ્યું છે.

EDની ઊંડી તપાસમાં એ પણ સામે આવ્યું છે કે સુરેકાએ પોતાની ઓછી નેટવર્થ છતાં જટિલ કોર્પોરેટ માળખા અને ડિજિટલ સહીઓના દુરુપયોગ દ્વારા સેંકડો કરોડની સંપત્તિ પોતાના નિયંત્રણમાં લીધી હતી. કાળા નાણાંને સફેદ કરવા માટે નકલી લોન અને ખોટા ખર્ચાઓ દર્શાવીને નાણાં પોતાના પરિવારની કંપનીઓમાં વાળી દીધા હતા. આ કેસમાં અગાઉ સીબીઆઈએ ૨૦૧૬માં એફઆઈઆર નોંધી હતી, જેના આધારે મની લોન્ડરિંગની તપાસ શરૂ થઈ હતી. હાલમાં આરોપીને જેલના સળિયા પાછળ ધકેલી દેવાયો છે અને આ મસમોટા નેટવર્ક સાથે જોડાયેલા અન્ય લોકોની પણ કડક પૂછપરછ કરવામાં આવી રહી છે.