મુંબઈ: મુંબઈ મહાનગરપાલિકા (BMC) ચૂંટણી ૨૦૨૬ના શુક્રવારે જાહેર થયેલા પરિણામોમાં શહેરના અનુભવી રાજકારણીઓનો જાદુ ફરી એકવાર જોવા મળ્યો છે. મુંબઈના ચાર ભૂતપૂર્વ મેયર અને ત્રણ ડેપ્યુટી મેયરોએ પોતપોતાના વોર્ડમાં જીત મેળવીને સાબિત કરી દીધું છે કે જનતાનો તેમના પરનો વિશ્વાસ આજે પણ અકબંધ છે. ખાસ કરીને શિવસેના (UBT) ના ઉમેદવારોએ અનેક મહત્વની બેઠકો પર વિરોધી પક્ષોના મજબૂત ઉમેદવારોને પરાજય આપ્યો છે.
પૂર્વ મેયરોનો વિજયી હુમલો
શિવસેના (UBT) ના આક્રમક નેતા અને પૂર્વ મેયર કિશોરી પેડનેકરે વોર્ડ ૧૯૯ (સાત રસ્તો-ધોબીઘાટ) માંથી શિવસેનાના રૂપલ કુસલેને હરાવીને જીત મેળવી છે. તેવી જ રીતે, માહિમ-શિવાજી પાર્ક જેવા પ્રતિષ્ઠિત વિસ્તાર (વોર્ડ ૧૯૧) માં વિશાખા રાઉતે પ્રિયા સરવણકરને હરાવીને ભગવો લહેરાવ્યો છે. સેવરીમાં શ્રદ્ધા જાધવે ભાજપના પાર્થ બાવકરને અને માહિમ કોલીવાડામાં મિલિંદ વૈદ્યએ ભાજપના રાજન પારકરને હરાવી પોતાની બેઠક જાળવી રાખી છે.
ડેપ્યુટી મેયરોનો પણ દબદબો
ડેપ્યુટી મેયર રહી ચૂકેલા હેમાંગી વર્લીકરે વરલી કોલીવાડા (વોર્ડ ૧૯૩) માંથી શિવસેનાના પ્રહલાદ વર્લીકરને હાર આપી છે. મલાડ પૂર્વમાં સુહાસ વાડકરે જીત મેળવી છે. બીજી તરફ, ભાજપના નેતા અને પૂર્વ ડેપ્યુટી મેયર અલ્કા કેરકરે બાંદ્રા પશ્ચિમ (વોર્ડ ૯૮) માંથી મનસેના ઉમેદવારને હરાવીને પોતાની લોકપ્રિયતા પુરવાર કરી છે.
ઉજવણીનો માહોલ
આ પરિણામો જાહેર થતા જ મુંબઈના વિવિધ વિસ્તારોમાં શિવસેના (UBT) અને ભાજપના કાર્યકરોમાં ભારે ઉત્સાહ જોવા મળ્યો હતો. ઢોલ-નગારા અને ગુલાલની છોળો વચ્ચે વિજેતા ઉમેદવારોનું સ્વાગત કરવામાં આવ્યું હતું. મુંબઈગરાઓએ ફરી એકવાર અનુભવી નેતાઓ પર પસંદગી ઉતારીને સંકેત આપ્યો છે કે તેઓ શહેરના વિકાસ માટે જાણીતા ચહેરાઓ પર વધુ ભરોસો કરે છે.