વારાણસી: ઉત્તર પ્રદેશના મુખ્યમંત્રી યોગી આદિત્યનાથે શનિવારે વારાણસીની મુલાકાત દરમિયાન વિરોધ પક્ષો, ખાસ કરીને કોંગ્રેસ પર આકરા પ્રહારો કર્યા હતા. સીએમ યોગીએ ગંભીર આક્ષેપ કરતા કહ્યું કે, કાશીના વધતા પ્રભાવ અને વિકાસને રોકવા માટે સતત ષડયંત્રો રચવામાં આવી રહ્યા છે. તેમણે ટાંક્યું કે કેટલાક લોકોએ કાશીની વૈશ્વિક છબીને ખરડવા માટે જાણે 'ખંડણી' લીધી હોય તેમ તેઓ પાયાવિહોણો પ્રચાર કરી રહ્યા છે.
 કોંગ્રેસની ટીકાનો જવાબ આપતા મુખ્યમંત્રીએ જણાવ્યું કે, વિપક્ષ દ્વારા આર્ટિફિશિયલ ઇન્ટેલિજન્સ (AI) નો ઉપયોગ કરીને ખોટા વીડિયો બનાવવામાં આવી રહ્યા છે જેથી જનતાને ગેરમાર્ગે દોરી શકાય. તેમણે સ્પષ્ટ કર્યું કે કાશીના ઘાટો પર ચાલી રહેલા વિકાસ કાર્યો સનાતન ધર્મના મૂલ્યો અને ભક્તોની સુવિધાને ધ્યાનમાં રાખીને જ કરવામાં આવી રહ્યા છે. મણિકર્ણિકા અને હરિશ્ચંદ્ર ઘાટના પ્રોજેક્ટ્સનો ઉલ્લેખ કરતા તેમણે કહ્યું કે, સરકાર અંતિમ સંસ્કાર માટે આવતા લોકો માટે ગૌરવપૂર્ણ વિદાય અને શ્રેષ્ઠ સુવિધાઓ સુનિશ્ચિત કરવા માંગે છે.
સીએમ યોગીએ પર્યાવરણના જતન પર ભાર મુકતા અપીલ કરી કે અગ્નિસંસ્કાર પછી અસ્થિઓને ગંગામાં વિસર્જિત ન કરવી જોઈએ, કારણ કે તેનાથી નદીના BOD અને COD સ્તરમાં વધારો થાય છે. સરકાર સ્મશાન ઘાટો પર પ્લેટફોર્મ, વેઇટિંગ રૂમ, શૌચાલય અને કચરા વ્યવસ્થાપનની એવી આધુનિક વ્યવસ્થા કરી રહી છે કે જેથી ગંગા પ્રદૂષિત ન થાય અને ડોમ સમુદાયના સન્માનની પણ જાળવણી થાય.
મુખ્યમંત્રીએ ગૌરવ સાથે જણાવ્યું કે, પીએમ નરેન્દ્રભાઈ મોદીના નેતૃત્વમાં કાશીને આઝાદી પછીનું સાચું સન્માન મળ્યું છે. કાશી માટે કુલ ૫૫,૦૦૦ કરોડ રૂપિયાના પ્રોજેક્ટ્સ મંજૂર કરવામાં આવ્યા છે, જેમાંથી ૩૬,૦૦૦ કરોડના કામો પૂર્ણ થઈ ચૂક્યા છે. ૨૦૧૪ પહેલા કાશીમાં દરરોજ માત્ર ૫,૦૦૦ થી ૨૫,૦૦૦ ભક્તો આવતા હતા, જે આંકડો આજે વધીને ૧.૨૫ લાખથી ૧.૫૦ લાખ સુધી પહોંચી ગયો છે. કાશીના પ્રવાસન અને વિકાસે દેશના GDPમાં ૧.૩ લાખ કરોડ રૂપિયાનું માતબર યોગદાન આપ્યું છે.