નવી દિલ્હી : મહારાષ્ટ્રની સ્થાનિક સ્વરાજ્યની ચૂંટણીમાં ભાજપ-શિવસેના ગઠબંધનના ભવ્ય વિજય બાદ પૂર્વ કેન્દ્રીય મંત્રી અને ભાજપના વરિષ્ઠ નેતા રવિશંકર પ્રસાદે વિપક્ષી છાવણીમાં સોંપો પાડી દીધો છે. મીડિયા સાથેની વાતચીતમાં તેમણે મહારાષ્ટ્રના પરિણામોને "શાનદાર અને ઐતિહાસિક" ગણાવતા કહ્યું કે, જનતાએ વડાપ્રધાન નરેન્દ્ર મોદીના સુશાસન અને દેવેન્દ્ર ફડણવીસના નેતૃત્વ પર મહોર લગાવી દીધી છે. ખાસ કરીને મુંબઈ, પુણે અને નાગપુર જેવા મેટ્રો શહેરોમાં ૩૦ વર્ષ બાદ ભાજપે જે રીતે ક્લીન સ્વીપ કર્યું છે, તેનાથી વિપક્ષોના અસ્તિત્વ સામે સવાલો ઉભા થયા છે.
વિરોધ પક્ષોના સુપડા સાફ
પ્રસાદે રાહુલ ગાંધી અને ઉદ્ધવ ઠાકરે પર નિશાન સાધતા સવાલ કર્યો કે, "આજે મુંબઈમાં કોંગ્રેસ ક્યાં છે? અને ઉદ્ધવ ઠાકરેની શિવસેના ક્યાં ખોવાઈ ગઈ છે?" તેમણે દાવો કર્યો કે મહારાષ્ટ્રની ૨૬ મહાનગરપાલિકાઓમાં હવે 'ટ્રિપલ એન્જિન' સરકાર (ભાજપ, શિંદે જૂથ અને અજીત પવાર જૂથ) વિકાસની રફ્તાર વધારશે. પ્રસાદે વધુમાં ઉમેર્યું કે બિહાર અને મહારાષ્ટ્ર બાદ હવે બંગાળમાં પણ ભાજપ વિજયનો પરચમ લહેરાવશે.
BMC માં ભાજપની એકતરફી લોકપ્રિયતા
મુંબઈ મહાનગરપાલિકા (BMC) ના આંકડાઓ રજૂ કરતા તેમણે જણાવ્યું કે, ભાજપે ૪૫.૨૨ ટકા મતો મેળવીને સાબિત કરી દીધું છે કે તે મુંબઈનો એકમાત્ર સૌથી મોટો અને લોકપ્રિય પક્ષ છે. બીજી તરફ, ઉદ્ધવ ઠાકરેની સેના (UBT) અને રાજ ઠાકરેની MNS નું ગઠબંધન માત્ર ૧૩.૧૩ ટકા મતોમાં સમેટાઈ ગયું છે. કોંગ્રેસની હાલત પણ અત્યંત દયનીય રહી છે, જેને માત્ર ૪.૪૪ ટકા મતોથી સંતોષ માનવો પડ્યો છે.
મેયર પદ માટે ફડણવીસની રણનીતિ
ચૂંટણી પરિણામો બાદ હવે સૌની નજર મેયર પદ પર છે. મુખ્યમંત્રી દેવેન્દ્ર ફડણવીસે સ્પષ્ટતા કરી છે કે મેયર કોણ બનશે તેનો નિર્ણય એકનાથ શિંદે અને ગઠબંધનના નેતાઓ સાથે મળીને સામૂહિક રીતે લેવામાં આવશે. ૨૯ માંથી ૨૫ નગરપાલિકાઓમાં મહાયુતિ પોતાના મેયર બનાવવાની તૈયારી કરી રહ્યું છે, જેના કારણે વિપક્ષી છાવણીમાં ભારે ચિંતા જોવા મળી રહી છે.