બેઇજિંગ: ચીનમાં લશ્કરી અને સંવેદનશીલ ટેકનોલોજી ક્ષેત્રમાં કામ કરતા અધિકારીઓ પર 'હની ટ્રેપ' (Honey Trap) નું સંકટ ઘેરું બન્યું છે. ચીની સરકારના સત્તાવાર અહેવાલો મુજબ, વિદેશી ગુપ્તચર એજન્સીઓ ચીનના રક્ષણ અને હાઈ-ટેક સેક્ટરના કર્મચારીઓને નિશાન બનાવી રહી છે. આ ગંભીર જોખમને ધ્યાનમાં રાખીને, ચીનના નેશનલ એડમિનિસ્ટ્રેશન ફોર સ્ટેટ સિક્રેટ્સ પ્રોટેક્શને તમામ સંરક્ષણ કર્મચારીઓ માટે કડક સુરક્ષા એડવાઈઝરી જારી કરી છે.
ચીની વહીવટીતંત્રે એક ચોંકાવનારા કિસ્સાનો ખુલાસો કર્યો છે, જેમાં 'ગુઓ' નામનો એક લશ્કરી કંપનીનો કર્મચારી વિદેશી જાળમાં ફસાયો હતો. વિદેશ પ્રવાસ દરમિયાન ગુઓ એક મહિલા જાસૂસના સંપર્કમાં આવ્યો હતો. બંને વચ્ચે પ્રેમ સંબંધ બંધાયા બાદ મહિલાએ અસલી રૂપ બતાવ્યું અને ગુઓને બ્લેકમેઈલ કરવાનું શરૂ કર્યું. બદનામીના ડરથી ગુઓએ દેશની અત્યંત ગુપ્ત લશ્કરી અને ટેકનિકલ માહિતી વિદેશી એજન્સીને સોંપી દીધી હતી. એટલું જ નહીં, તેણે પોતાના સાથી કર્મચારીઓને પણ આ જાસૂસી નેટવર્કમાં ધકેલી દીધા હતા.
તાજેતરમાં સોશિયલ મીડિયા પ્લેટફોર્મ X પર પણ એવી અટકળો તેજ બની છે કે ચીનના કેટલાક ઉચ્ચ હોદ્દા પર બેઠેલા નેતાઓ પણ આ હની ટ્રેપનો શિકાર બન્યા છે. જાસૂસો અધિકારીઓની વ્યક્તિગત નબળાઈઓનો લાભ ઉઠાવીને તેમને રાજ્યના રહસ્યો વેચવા માટે મજબૂર કરે છે. આ ઘટના બાદ ચીની સરકારે વિદેશ પ્રવાસ કરતા તમામ સરકારી કર્મચારીઓ માટે કડક દેખરેખ પ્રણાલી લાગુ કરી છે.
 ચીની સરકારે સ્પષ્ટ કર્યું છે કે હવેથી કોઈપણ સંવેદનશીલ વિભાગના કર્મચારીએ વિદેશ જતાં પહેલા સુરક્ષા તપાસમાંથી પસાર થવું પડશે. વિદેશમાં હોય ત્યારે પણ તેમના પર સતત દેખરેખ રાખવામાં આવશે અને પરત ફરતી વખતે તેમણે વિદેશમાં કોની સાથે મુલાકાત કરી તેની તમામ વિગતો જાહેર કરવી પડશે. ચીનનો દાવો છે કે વિદેશી શક્તિઓ તેના સંરક્ષણ ક્ષેત્રને અસ્થિર કરવા માટે આ પ્રકારના સુનિયોજિત કાવતરાં કરી રહી છે.