અયોધ્યા:વિશ્વવિખ્યાત સંગીતકાર એ.આર. રહેમાન અત્યારે પોતાના એક નિવેદનને કારણે મુશ્કેલીમાં મુકાયા છે. બોલીવુડમાં "સાંપ્રદાયિકતા" અને મુસ્લિમ હોવાને કારણે કામ ન મળતું હોવાના તેમના દાવાએ આખા દેશમાં ચર્ચા જગાવી છે. આ મામલે હવે અયોધ્યાના પ્રતિષ્ઠિત સંતોનો ગુસ્સો ફાટી નીકળ્યો છે. સંતોએ રહેમાનના આ નિવેદનને હિન્દુ સમુદાય અને ભારતની છબીને વૈશ્વિક સ્તરે બદનામ કરવાનું એક પદ્ધતિસરનું કાવતરું ગણાવ્યું છે.

તપસ્વી છાવણીના જગદગુરુ પરમહંસ આચાર્યએ રહેમાન પર આકરા પ્રહારો કરતા કહ્યું કે, "એ.આર. રહેમાન એ વ્યક્તિ છે જેમણે કામ મેળવવા માટે જ ઇસ્લામ ધર્મ સ્વીકાર્યો હતો. તેમણે આ જ હિન્દી સિનેમામાં કામ કરીને અઢળક સંપત્તિ અને ખ્યાતિ મેળવી છે. આજે જ્યારે નવી પ્રતિભા સામે આવી રહી છે, ત્યારે તેઓ પોતાની નિષ્ફળતા છુપાવવા માટે 'મુસ્લિમ કાર્ડ' રમી રહ્યા છે. આ આરોપ પાયાવિહોણો છે, કારણ કે કલા જગતમાં ફક્ત પ્રતિભા જ બોલે છે, ધર્મ નહીં."
હનુમાનગઢીના સંત ડૉ. દેવેશાચાર્યએ પણ આ નિવેદનને બાલિશ ગણાવ્યું છે. તેમણે પ્રશ્ન કર્યો કે, "જો ફિલ્મ ઉદ્યોગમાં ધર્મના આધારે ભેદભાવ હોત, તો એ.આર. રહેમાનને ઓસ્કાર જેવું સર્વોચ્ચ સન્માન ભારતમાંથી કેવી રીતે મળ્યું હોત? સત્ય એ છે કે હવે યુવા સંગીતકારો ઉભરી રહ્યા છે અને કદાચ રહેમાનની સંગીત સર્જનની ક્ષમતા પહેલા જેવી રહી નથી. યોગ્યતાના આધારે તકો ન મળતી હોય ત્યારે ધર્મનો સહારો લેવો તે દુર્ભાગ્યપૂર્ણ છે."
અયોધ્યાના સંતોએ એકસૂરે જણાવ્યું કે ભારત હવે બદલાઈ ગયું છે. વિકસિત ભારતમાં દરેક નાગરિકને સમાન અધિકારો છે અને કોઈ એક વ્યક્તિ કે ચોક્કસ સમુદાયનું વર્ચસ્વ ચાલતું નથી. ફિલ્મી દુનિયામાં જો સક્ષમ હશો તો જ ટકી શકશો. રહેમાન જેવા કલાકારે આવા વિભાજનકારી નિવેદનોથી બચવું જોઈએ. અત્યારે સોશિયલ મીડિયા પર પણ રહેમાનના આ નિવેદનની વિરુદ્ધ અને સમર્થનમાં મોટી જંગ છેડાઈ છે.