તેહરાન:ઈરાન દ્વારા અટકાયત કરવામાં આવેલા ૧૬ ભારતીય નાવિકોના મામલે અત્યારે આંતરરાષ્ટ્રીય સ્તરે ભારે હલચલ જોવા મળી રહી છે. તેહરાન સ્થિત ભારતીય દૂતાવાસ આ નાવિકોને છોડાવવા માટે અત્યંત આક્રમક અને સક્રિય ભૂમિકા ભજવી રહ્યું છે. ભારતીય મિશન સતત ઈરાની સત્તાવાળાઓના સંપર્કમાં છે જેથી આ નાવિકોને વહેલી તકે રાજદ્વારી સંપર્ક (Consular Access) અને જરૂરી કાનૂની ઢાલ પૂરી પાડી શકાય. ભારત સરકાર પોતાના નાગરિકોની સુરક્ષા અને ગરિમા જાળવી રાખવા માટે તમામ સ્તરે પ્રતિબદ્ધ છે અને આ કેસના વહેલા ઉકેલ માટે તેહરાનના સત્તાધીશો પર સતત દબાણ બનાવી રહી છે.

આ સંકટની શરૂઆત ડિસેમ્બર ૨૦૨૫ના મધ્યમાં થઈ હતી, જ્યારે ઈરાને 'એમટી વેલિયન્ટ રોઅર' (MT Valiant Roar) નામના જહાજને શંકાસ્પદ રીતે રોકી લીધું હતું. આ જહાજ પર ૧૬ ભારતીય ક્રૂ મેમ્બર્સ સવાર હતા, જેમના ભાવિ પર અત્યારે પ્રશ્નાર્થચિહ્ન લાગ્યું છે. ઘટનાની ગંભીરતા જોતા બંદર અબ્બાસ સ્થિત ભારતીય વાણિજ્ય દૂતાવાસે તાત્કાલિક ઈરાન સરકારને ઔપચારિક પત્ર લખીને નાવિકો સાથે રૂબરૂ મુલાકાતની પરવાનગી માંગી હતી. તેહરાન અને બંદર અબ્બાસ બંને મહત્વના કેન્દ્રો પર ઉચ્ચસ્તરીય બેઠકોનો દોર ચાલી રહ્યો છે જેથી નાવિકોને મજબૂત કાનૂની પ્રતિનિધિત્વ મળે અને તેમની મુક્તિની પ્રક્રિયાને વેગ મળે.

જાન્યુઆરીની કકડતી ઠંડીમાં જ્યારે જહાજ પર ખોરાક અને પાણીની અછતના ચિંતાજનક સમાચાર સામે આવ્યા, ત્યારે ભારતીય મિશને સમય સૂચકતા વાપરીને હસ્તક્ષેપ કર્યો હતો. ઈરાની નૌસેનાના સહયોગથી જહાજ પર જીવનજરૂરી ચીજવસ્તુઓની સપ્લાય તાત્કાલિક અસરથી પુનઃસ્થાપિત કરવામાં આવી હતી. ભારતીય દૂતાવાસે માનવીય અભિગમ દાખવીને વિનંતી કરી છે કે નાવિકોને તેમના ચિંતિત પરિવાર સાથે વાત કરવાની મંજૂરી આપવામાં આવે. આ ઉપરાંત, દૂતાવાસ યુએઈ સ્થિત જહાજ માલિક અને તેમના ઈરાની એજન્ટોના પણ સંપર્કમાં છે જેથી બળતણ અને ભોજનની કોઈ તકલીફ ન પડે.