સોલાપુર:મહારાષ્ટ્રના સોલાપુર-પુણે રાષ્ટ્રીય ધોરીમાર્ગ પર શનિવારની મધરાત્રિએ એક એવી હૃદયદ્રાવક ઘટના બની છે જેણે ભક્તિના માર્ગે નીકળેલા એક પરિવારના સપનાઓને ક્ષણભરમાં રોળી નાખ્યા છે. નવી મુંબઈના પનવેલથી અક્કલકોટ સ્વામી સમર્થના દર્શન કરવા જઈ રહેલા શ્રદ્ધાળુઓની કાર મોહોલ નજીક દેવદરી પાટી પાસે અકસ્માતનો ભોગ બની હતી. પૂરપાટ ઝડપે દોડતી કારના ચાલકે અચાનક સ્ટેયરિંગ પરથી કાબૂ ગુમાવતા કાર રસ્તાની બાજુમાં આવેલા એક વિશાળ ઝાડ સાથે જોરદાર ધડાકા સાથે અથડાઈ હતી. આ અકસ્માત એટલો ભયાનક હતો કે કારમાં સવાર ૫ લોકોના ઘટનાસ્થળે જ કમકમાટીભર્યા મોત નીપજ્યા હતા.

પોલીસના જણાવ્યા અનુસાર, અકસ્માત સમયે કારની ગતિ ખૂબ જ વધારે હતી, જેના કારણે ઝાડ સાથેના ટકરાવમાં કારના ફુરચા ઉડી ગયા હતા. અંધારી રાતે સર્જાયેલી આ દુર્ઘટનામાં પાંચ જિંદગીઓ હોમાઈ ગઈ છે, જ્યારે એક મહિલા આ અકસ્માતમાં ચમત્કારિક રીતે જીવિત બચી છે પરંતુ તેની હાલત અત્યંત નાજુક છે. તેને તાત્કાલિક સ્થાનિક હોસ્પિટલમાં ખસેડવામાં આવી છે. મોહોલ પોલીસની ટીમ ઘટનાસ્થળે પહોંચી ત્યારે કાર લોખંડના ડબ્બાની જેમ વળી ગઈ હતી અને મૃતદેહોને બહાર કાઢવા માટે ભારે જહેમત ઉઠાવવી પડી હતી. આ દુર્ઘટનાને પગલે સમગ્ર વિસ્તારમાં શોકનું મોજું ફરી વળ્યું છે.

માત્ર સોલાપુર જ નહીં, રાજસ્થાનના ઉદયપુરમાં પણ શનિવારે સવારે રક્તરંજીત અકસ્માત સર્જાયો હતો. જૂના અમદાવાદ હાઈવે પર સવિના પોલીસ સ્ટેશન વિસ્તારમાં બે કાર સામસામે ધડાકાભેર અથડાતા ચાર આશાસ્પદ યુવાનોના કરુણ મોત નીપજ્યા હતા. નેલા તાલાબ નજીક થયેલા આ અકસ્માતમાં ૧૪ થી ૧૯ વર્ષની વયના ચાર યુવકોએ જીવ ગુમાવ્યો છે, જ્યારે અન્ય છ લોકો લોહીલુહાણ હાલતમાં સારવાર હેઠળ છે. ઉદયપુરના સ્થાનિક રહેવાસી આ યુવાનોના મોતના સમાચારથી મુર્શીદ નગર અને બરકત કોલોનીમાં માતમ છવાઈ ગયો છે.

હાઈવે પર સતત વધી રહેલા અકસ્માતોએ ફરી એકવાર માર્ગ સલામતી અને રાત્રિના સમયે ડ્રાઈવિંગ દરમિયાન રાખવી પડતી સાવચેતી પર મોટા સવાલો ઉભા કર્યા છે. પોલીસે બંને અકસ્માતોમાં ગુનો નોંધીને વધુ તપાસ હાથ ધરી છે. સોલાપુર અકસ્માતના મૃતકોની ઓળખ વિધિ પૂર્ણ થયા બાદ તેમના પરિવારજનોને જાણ કરવાની તજવીજ ચાલી રહી છે. અક્કલકોટના દર્શને જઈ રહેલા શ્રદ્ધાળુઓ માટે આ યાત્રા અંતિમ યાત્રા સાબિત થશે તેની કલ્પના પણ કોઈએ કરી નહોતી.