મુંબઈ:ભારતની સૌથી મોટી ખાનગી બેંક HDFC એ તેના સૌથી પ્રીમિયમ અને પ્રતિષ્ઠિત 'ઇન્ફિનિયા' (Infinia) ક્રેડિટ કાર્ડના રિવોર્ડ સ્ટ્રક્ચરમાં મોટો ફેરફાર કરીને લાખો કાર્ડધારકોને ચોંકાવી દીધા છે. ૧૬ જાન્યુઆરી, ૨૦૨૬ થી અમલમાં આવેલા આ નવા નિયમોને કારણે હવે કાર્ડધારકોને મળતા ફાયદાઓમાં ભારે ઘટાડો થયો છે. ખાસ કરીને જે લોકો સ્માર્ટબાય પ્લેટફોર્મ પર Gyftr દ્વારા વિવિધ બ્રાન્ડના વાઉચર્સ ખરીદીને અધધ રિવોર્ડ્સ મેળવતા હતા, તેમના માટે આ ફેરફાર મોટો આર્થિક ફટકો સાબિત થશે. બેંકે ઓપરેશનલ ખર્ચ અને બજારની બદલાતી પરિસ્થિતિઓને ટાંકીને આ નિર્ણય લીધો છે, પરંતુ સોશિયલ મીડિયા પર પ્રીમિયમ યુઝર્સ આ ફેરફારનો વિરોધ કરી રહ્યા છે.
નવા નિયમો મુજબ, ઇન્ફિનિયા ક્રેડિટ કાર્ડ ધારકોને હવે સ્માર્ટબાય વાઉચર પર પહેલા જે 5X રિવોર્ડ પોઈન્ટ્સ મળતા હતા, તેના બદલે હવે માત્ર 3X રિવોર્ડ પોઈન્ટ્સ જ મળશે. આનો સીધો અર્થ એ થયો કે જે અસરકારક રિવોર્ડ રેટ (Reward Rate) અગાઉ ૧૬.૫% જેવો ઊંચો હતો, તે હવે ઘટીને સીધો ૧૦% પર આવી ગયો છે. એટલું જ નહીં, ઓનલાઇન શોપિંગ માટે સૌથી વધુ વપરાતા એમેઝોન પે (Amazon Pay) વાઉચર્સ પરનું વળતર પણ ઘટીને માત્ર ૫.૭૭% થઈ ગયું છે. આ ઘટાડાથી તે ગ્રાહકો સૌથી વધુ પ્રભાવિત થશે જેઓ વર્ષે લાખો રૂપિયાનો ખર્ચ કરીને વેકેશન કે ફ્લાઈટ બુકિંગ માટે આ રિવોર્ડ પોઈન્ટ્સનો ઉપયોગ કરતા હતા.
ફક્ત રિવોર્ડ્સમાં ઘટાડો જ નહીં, પરંતુ બેંકે હવે કેટલીક ચોક્કસ બ્રાન્ડ્સના વાઉચર્સ પર ૪% સુધીની 'કન્વીનિયન્સ ફી' (સુવિધા શુલ્ક) પણ લાગુ કરી દીધી છે. આ ફી લાગુ થયા પછી, ગ્રાહકોને મળતું ચોખ્ખું રિવોર્ડ મૂલ્ય ઘટીને માત્ર ૬% ની આસપાસ રહી શકે છે. આ ફેરફારો બાદ, એવું માનવામાં આવે છે કે ઇન્ફિનિયા કાર્ડની જે 'સુપર પ્રીમિયમ' ઓળખ હતી તે હવે અન્ય કાર્ડ્સ જેવી કે બિઝ બ્લેક (Biz Black) અને ડાઇનર્સ ક્લબ બ્લેક (Diners Club Black) ની હરોળમાં આવી ગઈ છે. અગાઉ ઇન્ફિનિયા તેના અદ્વિતીય રિવોર્ડ બેનિફિટ્સ માટે જાણીતું હતું, જે ફાયદો હવે લગભગ સમાપ્ત થઈ ગયો છે.
ભારતીય ક્રેડિટ કાર્ડ માર્કેટમાં છેલ્લા કેટલાક સમયથી તમામ મોટી બેંકો તેમના કાર્ડ્સને 'ડીવેલ્યુ' (મૂલ્ય ઘટાડવું) કરી રહી છે. એક્સિસ બેંક અને ICICI બેંક બાદ હવે HDFC એ પણ આ માર્ગ અપનાવ્યો છે. બેંકિંગ નિષ્ણાતોના મતે, ગ્રાહકો દ્વારા રિવોર્ડ્સનો મહત્તમ ઉપયોગ અને પોઈન્ટ્સના રિડેમ્પશનમાં થયેલા વધારાને કારણે બેંકો પર આર્થિક ભારણ વધ્યું હતું. જોકે, આ ફેરફારથી ઇન્ફિનિયા કાર્ડધારકો હવે એક્સિસ મેગ્નસ કે અમેરિકન એક્સપ્રેસ જેવા અન્ય હાઈ-એન્ડ કાર્ડ્સ તરફ વળે તેવી પણ શક્યતા છે. જો તમે પણ ઇન્ફિનિયા કાર્ડ વાપરો છો, તો હવે તમારે તમારી ખર્ચ કરવાની પદ્ધતિમાં ફેરફાર કરવો અનિવાર્ય બનશે.