સિંગુર : પશ્ચિમ બંગાળના સિંગુરમાં એક વિશાળ જનમેદનીને સંબોધતા પ્રધાનમંત્રી નરેન્દ્ર મોદીએ મમતા બેનર્જી સરકાર વિરુદ્ધ સીધું જ યુદ્ધ છેડી દીધું છે. પીએમ મોદીએ કહ્યું કે, બંગાળની જનતા હવે ટીએમસીના અત્યાચાર અને 'જંગલ રાજ' થી કંટાળી ગઈ છે અને રાજ્યમાં પરિવર્તનની લહેર સ્પષ્ટ દેખાઈ રહી છે. તેમણે ભારપૂર્વક જણાવ્યું કે બંગાળના વિકાસ માટે 'ડબલ એન્જિન' સરકાર અનિવાર્ય છે, કારણ કે વર્તમાન સરકાર કેન્દ્રની ગરીબ કલ્યાણની યોજનાઓમાં સતત અવરોધ ઊભા કરી રહી છે. મોદીએ દિલ્હીનું ઉદાહરણ આપતા કહ્યું કે, જેવી રીતે ત્યાંની જનતાએ વિકાસ રોકનારી સરકારને હટાવી અને હવે ત્યાં ગરીબોને આયુષ્માન ભારતનો લાભ મળી રહ્યો છે, તેવી જ રીતે બંગાળના લોકો પણ ટીએમસીને સબક શીખવવા માટે તૈયાર છે.

રાષ્ટ્રીય સુરક્ષાના ગંભીર મુદ્દા પર બોલતા પીએમ મોદીએ ટીએમસી સરકાર પર ઘૂસણખોરીને પ્રોત્સાહન આપવાનો ગંભીર આરોપ લગાવ્યો હતો. તેમણે કહ્યું કે, પોતાની વોટ બેંક બચાવવા માટે મમતા સરકાર દેશની સુરક્ષા સાથે રમત રમી રહી છે અને સરહદ પર વાડ લગાવવા માટે જમીન પણ ફાળવતી નથી. મોદીએ યુવાનોને ચેતવણી આપતા કહ્યું કે, આ ઘૂસણખોરો તમારા હકની નોકરીઓ અને સંસાધનો છીનવી રહ્યા છે. તેમણે જનતાને આહ્વાન કર્યું કે તમારો એક મત આ નકલી દસ્તાવેજોના આધારે વસેલા લોકોને દેશનિકાલ કરવામાં અને બંગાળને સુરક્ષિત કરવામાં નિર્ણાયક સાબિત થશે.

વડાપ્રધાને હુગલીના પવિત્ર ઈતિહાસ અને વંદે માતરમ સાથેના તેના જોડાણને યાદ કરીને બંગાળના ગૌરવને જીતવાનો પ્રયાસ કર્યો હતો. તેમણે નેતાજી સુભાષચંદ્ર બોઝના સન્માનમાં લેવાયેલા ઐતિહાસિક નિર્ણયોનો ઉલ્લેખ કરી સાબિત કર્યું કે ભાજપ બંગાળના સપૂતોનું સાચું સન્માન કરે છે. પીએમ મોદીએ અંતમાં ભાવુક અપીલ કરતા કહ્યું કે, ટીએમસી બંગાળની માતાઓ, બહેનો અને ખેડૂતો પ્રત્યે દુશ્મનાવટભર્યું વલણ ધરાવે છે અને તેમના હક છીનવી રહી છે. આ રેલી બાદ સિંગુરનું રાજકીય તાપમાન ચરમસીમાએ પહોંચ્યું છે, જે આગામી ચૂંટણીઓમાં મોટા ઉલટફેરના સંકેત આપી રહ્યું છે.