મુંબઈ: બોલિવૂડના ખેલાડી કુમાર તરીકે ઓળખાતા અક્ષય કુમાર અને તેમના પત્ની ટ્વિંકલ ખન્ના સોમવારે સાંજે એક ગંભીર માર્ગ અકસ્માતનો ભોગ બન્યા હતા. મુંબઈના જુહુ વિસ્તારમાં આવેલા સિલ્વર બીચ કાફે નજીક આ ઘટના બની હતી. જોકે, સદનસીબે અભિનેતા અને તેમના પત્નીનો આબાદ બચાવ થયો છે. આ દુર્ઘટનામાં અક્ષય કુમારે માનવતાનું ઉત્તમ ઉદાહરણ પૂરું પાડ્યું હતું અને ખુદ ગાડીમાંથી ઉતરીને ઈજાગ્રસ્તોની મદદે આવ્યા હતા.
પ્રાપ્ત વિગતો અને પ્રત્યક્ષદર્શીઓના જણાવ્યા અનુસાર, સોમવારે મોડી સાંજે અક્ષય કુમાર અને ટ્વિંકલ ખન્ના વિદેશ પ્રવાસ પતાવીને એરપોર્ટથી જુહુ સ્થિત તેમના નિવાસસ્થાને પરત ફરી રહ્યા હતા. આ દરમિયાન જુહુ વિસ્તારમાં એક પૂરપાટ ઝડપે આવી રહેલી મર્સિડીઝ કારે એક ઓટો રિક્ષાને જોરદાર ટક્કર મારી હતી. ટક્કર એટલી ભયાનક હતી કે ઓટો રિક્ષા ફંગોળાઈને અક્ષય કુમારના કાફલાની (સિક્યુરિટી) ગાડી સાથે ધડાકાભેર અથડાઈ હતી. આ અકસ્માત અહીં જ અટક્યો નહોતો; ઓટો રિક્ષા સાથે અથડાયા બાદ સિક્યુરિટી ગાર્ડની ગાડીનું સંતુલન બગડ્યું હતું અને તે આગળ ચાલી રહેલી અક્ષય કુમારની લક્ઝુરિયસ એસયુવી કારના પાછળના ભાગે અથડાઈ હતી. આમ, એક પછી એક ત્રણ વાહનો વચ્ચે શ્રેણીબદ્ધ અકસ્માત (ચેઈન એક્સિડન્ટ) સર્જાયો હતો.
અકસ્માત થતાં જ રસ્તા પર નાસભાગ મચી ગઈ હતી અને લોકોના ટોળા એકઠા થઈ ગયા હતા. જોકે, આ ઘટનામાં અક્ષય કુમારે જે કર્યું તેની ચારેકોર પ્રશંસા થઈ રહી છે. પોતાની ગાડીને ટક્કર વાગી હોવા છતાં, જરા પણ ગભરાયા વિના અક્ષય કુમાર તાત્કાલિક તેમની એસયુવીમાંથી બહાર નીકળ્યા હતા. તેમણે જોયું કે અકસ્માતને કારણે ઓટો રિક્ષાનો કચ્ચરઘાણ નીકળી ગયો હતો અને તે બૂરી રીતે સુરક્ષા વાહનની નીચે દબાઈ ગઈ હતી. રિક્ષાચાલક અને તેમાં બેઠેલા મુસાફર અંદર ફસાઈ ગયા હતા.
કોઈ પણ જાતની રાહ જોયા વિના, અક્ષય કુમાર અને તેમના સ્ટાફ મેમ્બર્સે ભેગા મળીને ભારે જહેમત ઉઠાવી હતી. તેઓએ દબાયેલી અને કચડાયેલી રિક્ષાને ઊંચકી હતી અને અંદર ફસાયેલા ડ્રાઈવર તથા પેસેન્જરને સુરક્ષિત બહાર કાઢ્યા હતા. પ્રત્યક્ષદર્શીઓના મતે, આ દ્રશ્ય ખૂબ જ ડરામણું હતું, કારણ કે રિક્ષા સંપૂર્ણપણે ક્ષતિગ્રસ્ત થઈ ગઈ હતી.
ઘટનાસ્થળે હાજર લોકોએ જણાવ્યું હતું કે અકસ્માતની તીવ્રતા જોતા મોટી દુર્ઘટનાની આશંકા હતી, પરંતુ સદનસીબે કોઈ જાનહાનિ નોંધાઈ નથી. ઓટો રિક્ષામાં સવાર મુસાફરોને ઈજાઓ પહોંચી હતી, પરંતુ અક્ષય કુમારની સમયસૂચકતાને કારણે તેમને તાત્કાલિક બહાર કાઢી લેવામાં આવ્યા હતા અને મેડિકલ સહાય માટે મોકલી દેવામાં આવ્યા હતા. અક્ષય કુમાર અને ટ્વિંકલ ખન્ના સંપૂર્ણપણે સુરક્ષિત છે.
આ ઘટના બાદ સ્થાનિક પોલીસ પણ ઘટનાસ્થળે પહોંચી હતી અને ટ્રાફિક ક્લિયર કરાવવાની કામગીરી હાથ ધરી હતી. અક્ષય કુમારની આ કામગીરીને સોશિયલ મીડિયા અને ચાહકો દ્વારા બિરદાવવામાં આવી રહી છે, જેમણે સ્ટારડમ બાજુ પર મૂકીને એક સામાન્ય નાગરિકની જેમ ઈજાગ્રસ્તોની સેવા કરી હતી. હાલમાં આ અકસ્માત અંગે વધુ તપાસ ચાલી રહી છે.