સેન્ટ પોલ (મિનેસોટા) : અમેરિકાના મિનેસોટા રાજ્યમાં ફેડરલ એજન્ટોની અતિશય આક્રમકતા અને માનવ અધિકારોના ઉલ્લંઘનની એક હૃદયદ્રાવક ઘટના સામે આવી છે. ડોનાલ્ડ ટ્રમ્પ વહીવટીતંત્રના ઈમિગ્રેશન ક્રેકડાઉન હેઠળ, ICE (Immigration and Customs Enforcement) એજન્ટોએ રવિવારે સેન્ટ પોલમાં એક નિર્દોષ અમેરિકન નાગરિકના ઘરમાં બળજબરીથી ઘૂસી, તેને ભારે ઠંડીમાં અપમાનજનક રીતે ખેંચી જઈ આતંક મચાવ્યો હતો.
ભૂલથી દરોડો અને ક્રૂરતાની હદ
56 વર્ષીય ચોંગલી થાઓ (જે સ્કોટ તરીકે ઓળખાય છે) સોમવારે પોતાની આપવીતી જણાવતા ધ્રૂજી ઉઠ્યા હતા. તેમણે કહ્યું કે જ્યારે તેઓ ઘરમાં કરાઓકે ગાઈ રહ્યા હતા, ત્યારે અચાનક એજન્ટોએ દરવાજો તોડી નાખ્યો. એજન્ટોએ બંદૂકો તાણી તેમને હાથકડી પહેરાવી દીધી હતી. રવિવારે સેન્ટ પોલમાં તાપમાન માઈનસ 10 ડિગ્રી સેલ્સિયસ હતું, તેમ છતાં અધિકારીઓએ થાઓને કપડાં પહેરવાની તક આપી નહીં અને તેમને માત્ર બોક્સર શોર્ટ્સ અને ક્રોક્સમાં જ બરફ પર ખેંચી ગયા.
"ભગવાન, મેં શું ગુનો કર્યો છે?"
થાઓએ રડમસ અવાજે જણાવ્યું, "હું પ્રાર્થના કરતો હતો કે ભગવાન મને મદદ કરો, મેં કંઈ ખોટું કર્યું નથી. તેઓ મારી સાથે આવું કેમ કરે છે?" સોશિયલ મીડિયા પર વાયરલ થયેલા ફોટામાં જોઈ શકાય છે કે વૃદ્ધ થાઓ ઠંડીથી બચવા માટે તેમના પૌત્રના નાના ધાબળામાં પોતાને ઢાંકવાનો પ્રયાસ કરી રહ્યા છે. થાઓ 1974માં 4 વર્ષની ઉંમરે અમેરિકા આવ્યા હતા અને 1991થી તેઓ અમેરિકી નાગરિક છે.
DHS નો લૂલો બચાવ
હોમલેન્ડ સિક્યુરિટી વિભાગ (DHS) એ આ ઘટના અંગે બચાવ કરતા કહ્યું કે, અધિકારીઓ તે સરનામે બે વોન્ટેડ જાતીય અપરાધીઓની શોધમાં હતા. થાઓએ ફિંગરપ્રિન્ટ આપવાનો ઇનકાર કર્યો હોવાથી તેની અટકાયત કરવામાં આવી હતી. જોકે, પરિવારના જણાવ્યા મુજબ, જે ગુનેગારને તેઓ શોધી રહ્યા હતા તે વર્ષો પહેલા આ ઘર છોડીને જતો રહ્યો હતો. તપાસ બાદ કોઈ માફી કે સ્પષ્ટતા વગર થાઓને ઘરે છોડી દેવામાં આવ્યા હતા.
ન્યાયાલયની ફટકાર અને રાજકીય વિવાદ
આ ઘટના ત્યારે બની છે જ્યારે શુક્રવારે જ એક યુએસ ડિસ્ટ્રિક્ટ જજે ટ્રમ્પ વહીવટીતંત્રને આવી આક્રમક યુક્તિઓ વાપરવા સામે મનાઈ હુકમ આપ્યો હતો. જજ કેથરિન મેનેન્ડેઝે શસ્ત્રો તાકવા અને અકારણ ધરપકડ જેવી પદ્ધતિઓને ગેરબંધારણીય ગણાવી હતી. મિનેસોટામાં આશરે 3,000 ફેડરલ એજન્ટોની તૈનાતી વચ્ચે આ કિસ્સાએ લાઓસ અને હમોંગ સમુદાયના લોકોમાં ભારે રોષ અને ડર ફેલાવ્યો છે.
ચોંગલી થાઓએ સવાલ કર્યો કે, "જો આ અમેરિકા છે, તો આપણે અહીં સુરક્ષિત ભવિષ્ય માટે શું કામ આવ્યા છીએ?" હાલ પડોશીઓ તેમના તૂટેલા દરવાજાને સુધારવામાં મદદ કરી રહ્યા છે, પરંતુ તેમના મન પર પડેલા આઘાતના ઘા રુઝાતા સમય લાગશે.