જમ્મુ: આ વર્ષે ૨૬મી જાન્યુઆરીએ દિલ્હીના કર્તવ્ય પથ પર આયોજિત થનારી પ્રજાસત્તાક દિવસની પરેડમાં જમ્મુ-કાશ્મીરની એક દીકરી સમગ્ર દેશનું ધ્યાન ખેંચશે. દેશના પ્રથમ મહિલા 'રુદ્ર' એટેક હેલિકોપ્ટર પાઇલટ કેપ્ટન હંસજા શર્મા ૨૫૧ આર્મી એવિએશન સ્ક્વોડ્રનનું નેતૃત્વ કરીને નવો ઇતિહાસ રચવા જઈ રહ્યા છે. તાજેતરમાં સોશિયલ મીડિયા પર વાયરલ થયેલા પરેડ રિહર્સલના વીડિયોમાં કેપ્ટન હંસજા અત્યંત આત્મવિશ્વાસ સાથે સેનાની ફાયરપાવરનું પ્રદર્શન કરતા જોવા મળ્યા હતા.
જમ્મુના રેહરી કોલોનીના રહેવાસી અને પત્રકાર રશ્મિ શર્માની પુત્રી કેપ્ટન હંસજા શર્માએ નાસિકની કોમ્બેટ એવિએશન ટ્રેનિંગ સ્કૂલમાં તાલીમ દરમિયાન સર્વશ્રેષ્ઠ પ્રદર્શન કરીને પ્રતિષ્ઠિત 'સિલ્વર ચિત્તા ટ્રોફી' પોતાના નામે કરી હતી. હવે તેઓ પરેડમાં પોતાની જીપ પર સવાર થઈને 'હેલિના' (HELINA) ગાઈડેડ એન્ટી-ટેન્ક મિસાઈલ સિસ્ટમ સાથે સ્ક્વોડ્રનનું નેતૃત્વ કરશે, જે રુદ્ર હેલિકોપ્ટર દ્વારા દુશ્મનના ટેન્કોને તોડી પાડવાની ક્ષમતા ધરાવે છે.
 કેપ્ટન હંસજા માટે આ મુકામ સુધી પહોંચવું સરળ નહોતું. આર્મી ઓફિસર બનવાના સપના આડે ઘણી વખત મેડિકલ ટેસ્ટમાં દ્રષ્ટિ (Vision) અને વજનને કારણે અવરોધો આવ્યા હતા. જોકે, હાર માનવાને બદલે હંસજા એ પોતાની ખામીઓ પર કામ કર્યું અને NCCની તાલીમનો સહારો લઈને ભારતીય સેનામાં ગૌરવશાળી સ્થાન મેળવ્યું. તેમની આ સફળતામાં તેમની માતા રશ્મિ શર્માનો મોટો ટેકો રહ્યો છે.
ગર્વથી છલકાતી આંખો સાથે કેપ્ટન હંસજાની માતાએ જણાવ્યું હતું કે, "મારી દીકરીએ યુનિફોર્મ મેળવવા માટે લોહી-પરસેવો એક કર્યો છે. આજે મને ગર્વ છે કે તે રાષ્ટ્રની રક્ષા માટે સરહદ પર ઉભી છે. એક માતા તરીકે મારા માટે આનાથી મોટું સૌભાગ્ય શું હોઈ શકે કે આજે દુનિયા મને હંસજાની માતા તરીકે ઓળખે છે."
પ્રજાસત્તાક દિવસની પરેડમાં કેપ્ટન હંસજા શર્માની હાજરી માત્ર જમ્મુ માટે જ નહીં, પણ સમગ્ર દેશની મહિલાઓ માટે પ્રેરણા સ્ત્રોત બની રહે