મુંબઈ: દેશની સુરક્ષા વ્યવસ્થાને અભેદ્ય બનાવવા અને પડોશી દેશોની નાપાક હરકતો પર બાજ નજર રાખવા માટે ભારતે અવકાશમાં મોટી છલાંગ લગાવવાની તૈયારી કરી લીધી છે. સરહદ સુરક્ષાને વધારવા માટેના એક અત્યંત મહત્વકાંક્ષી પ્રોજેક્ટ હેઠળ, ભારત આગામી પાંચ વર્ષમાં એટલે કે વર્ષ ૨૦૨૯ સુધીમાં ૫૨ જેટલા અત્યાધુનિક જાસૂસી ઉપગ્રહો (સ્પાય સેટેલાઇટ્સ) અવકાશમાં તરતા મૂકશે. અંદાજે ૨.૮ અબજ ડોલરના જંગી ખર્ચે તૈયાર થનારા આ પ્રોજેક્ટનો મુખ્ય ઉદ્દેશ્ય ચીન અને પાકિસ્તાન સાથેની સરહદો પર ચોવીસ કલાક ચાંપતી નજર રાખવાનો છે.

આ ઉપગ્રહોની સૌથી મોટી ખાસિયત એ હશે કે તે માત્ર દિવસના અજવાળામાં જ નહીં, પરંતુ ઘોર અંધારી રાત્રે પણ સ્પષ્ટ તસવીરો અને ડેટા મોકલવા માટે સક્ષમ હશે. આર્ટિફિશિયલ ઈન્ટેલિજન્સ (એઆઈ) અને હાઈ-રિઝોલ્યુશન કેમેરાથી સજ્જ આ ઉપગ્રહો વાદળછાયા વાતાવરણમાં પણ દુશ્મનની ગતિવિધિઓને પકડી પાડશે. સંરક્ષણ મંત્રાલય અને ઈસરો સાથે મળીને આ મિશન પાર પાડશે. આ ઉપગ્રહો લશ્કરને રિયલ-ટાઈમ માહિતી પૂરી પાડશે, જેથી સરહદ પર ઘૂસણખોરી કે અન્ય કોઈ પણ લશ્કરી જમાવડાની જાણકારી તરત જ મળી જશે.

હાલમાં ભારત પાસે મર્યાદિત સંખ્યામાં સર્વેલન્સ સેટેલાઇટ્સ છે, જેના કારણે અમુક ચોક્કસ સમયે ડેટા મેળવવામાં મુશ્કેલી પડતી હતી. પરંતુ આ ૫૨ ઉપગ્રહોનું નેટવર્ક પૃથ્વીની ભ્રમણકક્ષામાં એવી રીતે ગોઠવવામાં આવશે કે ભારતની સરહદો પર એક પણ મિનિટ માટે નિરીક્ષણ તૂટશે નહીં. આ પ્રોજેક્ટ ભારતની સંરક્ષણ ક્ષમતાને અનેકગણી વધારી દેશે અને ભારતને અવકાશ યુદ્ધની તૈયારીમાં અમેરિકા અને રશિયા જેવા દેશોની હરોળમાં લાવીને મુકશે.