નવી દિલ્હી: ભારતીય પ્રજાસત્તાક દિવસની પરેડમાં દર વર્ષે દેશની સૈન્ય શક્તિ અને સાંસ્કૃતિક વિરાસતની ઝાંખી જોવા મળે છે, પરંતુ ૨૦૨૬ની પરેડ કંઈક ખાસ અને ‘ફિલ્મી’ રહેવાની છે. ભારતીય સિનેમાના ઈતિહાસમાં પ્રથમવાર, કોઈ ફિલ્મ દિગ્દર્શક કર્તવ્ય પથ પર ભારતીય સિનેમાનું પ્રતિનિધિત્વ કરશે. અને આ પ્રતિષ્ઠિત સન્માન માટે નામ પસંદ કરવામાં આવ્યું છે - ભવ્ય સેટ્સ અને ક્લાસિક સિનેમાના પર્યાય સમાન સંજય લીલા ભણસાલીનું.
સિનેમાની સફર રજૂ કરતી ખાસ ઝાંખી
માહિતી અને પ્રસારણ મંત્રાલયના સહયોગથી તૈયાર કરવામાં આવેલી આ ખાસ ઝાંખી સિનેમાની સદીઓ જૂની ભવ્ય સફર અને ભારતીય સંસ્કૃતિમાં તેના પ્રદાનને વિશ્વ સમક્ષ રજૂ કરશે. સૂત્રોના જણાવ્યા અનુસાર, ભારતીય સિનેમાના સાચા ‘ધ્વજવાહક’ તરીકે ભણસાલીથી શ્રેષ્ઠ બીજો કોઈ વિકલ્પ હોઈ શકે નહીં. તેમની ફિલ્મોમાં જોવા મળતી વિઝ્યુઅલ ટ્રીટ અને ભારતીય મૂળની વાર્તાઓ આ ઝાંખીમાં આકર્ષણનું કેન્દ્ર બનશે.
રાષ્ટ્રીય પુરસ્કારોથી પદ્મશ્રી સુધીની સફર
સંજય લીલા ભણસાલી માત્ર દિગ્દર્શક જ નહીં, પરંતુ એક કુશળ સંગીતકાર, પટકથા લેખક અને સંપાદક પણ છે. ૧૯૯૬માં ‘ખામોશી’ થી શરૂ થયેલી તેમની સફર ‘દેવદાસ’, ‘બાજીરાવ મસ્તાની’, ‘પદ્માવત’ અને તાજેતરમાં ‘ગંગુબાઈ કાઠિયાવાડી’ તેમજ ‘હીરામંડી’ જેવી બ્લોકબસ્ટર કૃતિઓ સુધી પહોંચી છે. સાત રાષ્ટ્રીય ફિલ્મ પુરસ્કારો અને પદ્મશ્રીથી સન્માનિત ભણસાલીની હાજરી આ પરેડની ગરિમામાં વધારો કરશે.
આગામી પ્રોજેક્ટ્સનો ધમધમાટ
હાલમાં ભણસાલી તેમની આગામી મહત્વાકાંક્ષી ફિલ્મ ‘લવ એન્ડ વોર’ માં વ્યસ્ત છે, જેમાં રણબીર કપૂર, આલિયા ભટ્ટ અને વિકી કૌશલ જેવા દિગ્ગજો જોવા મળશે. આ ઉપરાંત, ૨૦ ફેબ્રુઆરીએ તેમની સહ-નિર્મિત ફિલ્મ ‘દો દીવાને સેહર મેં’ પણ રિલીઝ થવાની તૈયારીમાં છે.
૨૬ જાન્યુઆરી, સોમવારે જ્યારે કર્તવ્ય પથ પર સિનેમાની આ ઝાંખી પસાર થશે, ત્યારે તે માત્ર એક મનોરંજન નહીં પરંતુ વિશ્વમાં ભારતની ‘સોફ્ટ પાવર’નું પ્રતિક બની રહેશે.