નવી દિલ્હી:  દિલ્હી અને તેની આસપાસના વિસ્તારોમાં હવાની ગુણવત્તા (AQI) માં સુધારો જોવા મળતા 'એર ક્વોલિટી મેનેજમેન્ટ કમિશન' (CAQM) એ GRAP-3 હેઠળના કડક પ્રતિબંધો તાત્કાલિક અસરથી હટાવી લીધા છે. આ નિર્ણયથી છેલ્લા ઘણા સમયથી ઠપ્પ પડેલા બાંધકામ અને તોડફોડના કામોને ફરી શરૂ કરવાની લીલી ઝંડી મળી ગઈ છે. આ ઉપરાંત પથ્થર તોડવાના ક્રશિંગ અને ઈંટના ભઠ્ઠા જેવી પ્રવૃત્તિઓ પરનો પ્રતિબંધ હટતા હજારો શ્રમિકોના રોજગાર પાછા ફર્યા છે. જોકે, પ્રશાસને સ્પષ્ટ કર્યું છે કે આ રાહત માત્ર શરતી છે અને ધૂળને નિયંત્રિત કરવાના નિયમોનું પાલન કરવું અનિવાર્ય રહેશે.

જોકે, GRAP-3 ભલે હટ્યો હોય પણ દિલ્હી હજુ સંપૂર્ણપણે જોખમ મુક્ત નથી, તેથી GRAP-2 ના નિયમો હજુ પણ ચાલુ રાખવામાં આવ્યા છે. આનો અર્થ એ છે કે હોટલ અને રેસ્ટોરન્ટમાં કોલસા કે લાકડાના ઉપયોગ પર હજુ પણ કડક મનાઈ છે. રસ્તાઓ પર ધૂળ ન ઉડે તે માટે સતત પાણીનો છંટકાવ અને મિકેનિકલ સ્વીપિંગ ચાલુ રહેશે. સૌથી મહત્વની વાત એ છે કે, હોસ્પિટલ અને રેલ્વે જેવી કટોકટીની સેવાઓ સિવાય ડીઝલ જનરેટર સેટના ઉપયોગ પરનો પ્રતિબંધ યથાવત રહેશે, જેથી પ્રદૂષણ ફરીથી 'ગંભીર' શ્રેણીમાં ન પહોંચી જાય.

વાહનવ્યવહારના ક્ષેત્રમાં પણ હજુ સાવચેતી રાખવામાં આવી રહી છે. BS-3 પેટ્રોલ અને BS-4 ડીઝલ વાહનોના સંચાલન પર બાજ નજર રાખવામાં આવશે અને પાર્કિંગ ફીમાં થયેલો વધારો પણ ચાલુ રહેશે, જેથી લોકો વ્યક્તિગત વાહનોના બદલે મેટ્રો કે બસ જેવા જાહેર પરિવહનનો વધુ ઉપયોગ કરે. વહીવટીતંત્રે લોકોને ચેતવણી આપી છે કે જો હવાની ગુણવત્તા ફરી બગડશે તો કોઈપણ સમયે પ્રતિબંધો ફરી લાદવામાં આવી શકે છે. હાલમાં આ છૂટછાટથી રિયલ એસ્ટેટ અને ટ્રાન્સપોર્ટ વ્યવસાયીઓએ રાહતનો શ્વાસ લીધો છે.