પુણે : ઇન્ડિયન પ્રીમિયર લીગ (IPL) ના ઈતિહાસમાં સૌથી મોટા માલિકી પરિવર્તનના એંધાણ મળી રહ્યા છે. દેશના દિગ્ગજ બિઝનેસ ટાયકૂન અને સીરમ ઇન્સ્ટિટ્યૂટ ઓફ ઇન્ડિયાના CEO અદાર પૂનાવાલાએ સત્તાવાર રીતે જાહેર કર્યું છે કે તેઓ રોયલ ચેલેન્જર્સ બેંગલુરુ (RCB) ફ્રેન્ચાઇઝીને હસ્તગત કરવા માટે ઉત્સુક છે. ગયા વર્ષે પહેલીવાર આઈપીએલ ટાઇટલ જીતીને 'ડિફેન્ડિંગ ચેમ્પિયન' બનેલી આરસીબી માટે હવે કોર્પોરેટ ગલીયારાઓમાં બોલીઓનો દોર શરૂ થવા જઈ રહ્યો છે.
X પર પૂનાવાલાની ગર્જના
અદાર પૂનાવાલાએ સોશિયલ મીડિયા પ્લેટફોર્મ X પર પોતાની યોજના સ્પષ્ટ કરતા લખ્યું કે, "આગામી થોડા મહિનાઓમાં, IPL ની શ્રેષ્ઠ ટીમોમાંની એક @RCBTweets માટે અમે એક અત્યંત મજબૂત અને સ્પર્ધાત્મક બોલી લગાવીશું." ૪૫ વર્ષીય પૂનાવાલા, જેઓ પૂનાવાલા ફિનકોર્પના ચેરમેન પણ છે, તેમના આ નિવેદનથી સ્પોર્ટ્સ બિઝનેસ જગતમાં ભારે ઉત્તેજના જોવા મળી રહી છે.
શા માટે વેચાઈ રહી છે RCB?
આરસીબીના વર્તમાન માલિક, યુનાઇટેડ સ્પિરિટ્સ લિમિટેડની પેરેન્ટ કંપની 'ડિયાજિયો' હવે આ ફ્રેન્ચાઇઝીને નવા હાથમાં સોંપવા માંગે છે. ૨૦૦૮માં જ્યારે આઈપીએલની શરૂઆત થઈ ત્યારે વિજય માલ્યાના યુબી ગ્રુપે ૧૧૧.૬ મિલિયન ડોલરમાં આ ટીમ ખરીદી હતી. ત્યારબાદ ૨૦૧૪માં લંડન સ્થિત ડિયાજિયો ગ્રુપ તેમાં બહુમતી હિસ્સેદાર બન્યું હતું. હવે કોર્પોરેટ ચેનલો દ્વારા આ વેચાણની પ્રક્રિયા આગળ વધશે.
ટીમનો ભવ્ય ઈતિહાસ અને ફેન ફોલોઈંગ
RCB એ IPL ની એવી ટીમ છે જેણે વર્ષો સુધી ટાઇટલ ન જીત્યું હોવા છતાં સૌથી મોટું ફેન બેઝ જાળવી રાખ્યું હતું. હવે જ્યારે ટીમ ડિફેન્ડિંગ ચેમ્પિયન છે, ત્યારે તેની બ્રાન્ડ વેલ્યુ આસમાને છે. અદાર પૂનાવાલા જેવા મોટા ગજાના ઉદ્યોગપતિના પ્રવેશથી આ ટીમની આર્થિક તાકાત અને લોકપ્રિયતામાં વધુ ઉછાળો આવવાની પૂરેપૂરી શક્યતા છે.
ક્રિકેટ પ્રેમીઓ હવે એ જોવાની રાહ જોઈ રહ્યા છે કે પૂનાવાલાની આ 'સ્પર્ધાત્મક બોલી' કેટલી મોટી હશે અને શું અન્ય કોઈ મોટા બિઝનેસ હાઉસ પણ આ રેસમાં જોડાય છે કે નહીં.