રાજકોટ: ગુરુવારના ટ્રેડિંગ સત્રમાં ભારતીય શેરબજારમાં તેજીનો માહોલ રહ્યો હતો અને નિફ્ટી ૫૦ ઇન્ડેક્સ ૨૫,૨૭૫ ની સપાટી વટાવીને બંધ રહ્યો હતો. જોકે, શુક્રવારનું સત્ર રોકાણકારો માટે ખૂબ જ મહત્વનું સાબિત થશે, કારણ કે બજાર બંધ થયા પછી અનેક દિગ્ગજ કંપનીઓએ પોતાના ત્રીજા ત્રિમાસિક ગાળાના (Q3) પરિણામો જાહેર કર્યા છે. આ સમાચારની સીધી અસર આવતીકાલે સવારે બજાર ખુલતાની સાથે જ સંબંધિત શેરો પર જોવા મળશે.
 ઇન્ડિગો : એરલાઇન સેક્ટરની આ દિગ્ગજ કંપની માટે Q3 મુશ્કેલ રહ્યો છે. કંપનીનો નફો ૭૭.૫ ટકા ઘટીને માત્ર ₹૫૫૦ કરોડ રહ્યો છે. ₹૧,૫૪૭ કરોડના અણધાર્યા નુકસાનને કારણે નફા પર માઠી અસર પડી છે.
બંધન બેંક બેંકિંગ ક્ષેત્રે અહીં પણ નિરાશા જોવા મળી છે. ચોખ્ખો નફો ૫૧.૬ ટકાના ઘટાડા સાથે ₹૨૦૫.૬ કરોડ નોંધાયો છે, જેની અસર શુક્રવારે શેરના ભાવ પર પડી શકે છે.
DLF: રિયલ એસ્ટેટ ક્ષેત્રની આ દિગ્ગજ કંપનીએ રોકાણકારોને ખુશ કર્યા છે. કંપનીના નફામાં ૧૩.૭ ટકાનો વધારો થયો છે અને આવકમાં ૩૨.૨ ટકાનો જંગી ઉછાળો જોવા મળ્યો છે.
એનર્જી અને ઇન્ફ્રાસ્ટ્રક્ચર સેક્ટરમાં હલચલ: તેલ અને ગેસ ક્ષેત્રની મહારત્ન કંપની ONGC એ ખાનગી પ્લેસમેન્ટ દ્વારા ભારત ઇથેન IFSC માં ૫૦ ટકા હિસ્સો ખરીદવાની જાહેરાત કરી છે, જે લાંબા ગાળા માટે પોઝિટિવ ગણાય છે. બીજી તરફ, NTPC ગ્રીન એનર્જી એ ઉત્તર પ્રદેશ સરકાર સાથે ગ્રીન હાઇડ્રોજન પ્રોજેક્ટ્સ માટે MoU કર્યા છે. અશોકા બિલ્ડકોન ને દમણથી ₹૩૦૮ કરોડનો નવો ઓર્ડર મળતા આ શેરમાં પણ તેજીની અપેક્ષા છે.
અન્ય મહત્વના શેરો પર એક નજર: IXIGO: ઓનલાઇન ટ્રાવેલ પ્લેટફોર્મના નફામાં ૫૬ ટકાનો તોતિંગ વધારો થયો છે.
પ્રીમિયર એનર્જીઝ: સોલર સેક્ટરની આ કંપનીના નફામાં ૫૪ ટકાનો વધારો નોંધાયો છે.
અદાણી ટોટલ ગેસ: નફામાં ૩.૩ ટકાનો નજીવો ઘટાડો થયો છે, પરંતુ ઓપરેશનલ કામગીરી સ્થિર છે.
રોકાણકારોએ શુક્રવારે ખાસ કરીને સ્મોલ ફાઇનાન્સ બેંકો અને IT કંપનીઓ જેવી કે Mphasis અને Cyient પર નજર રાખવી પડશે, કારણ કે તેમના પરિણામો મિશ્ર રહ્યા છે. બજારના નિષ્ણાતો માને છે કે જો વૈશ્વિક સંકેતો પોઝિટિવ રહેશે તો આ પરિણામોના આધારે પસંદગીના શેરોમાં મોટી તેજી જોવા મળી શકે છે.