કેલિફોર્નિયા: અત્યાર સુધી પર્વતો, દરિયાકિનારા કે જંગલોમાં હોટેલ સ્ટે માણ્યો હશે, પણ હવે પૃથ્વીથી ૩,૮૪,૪૦૦ કિલોમીટર દૂર ચંદ્ર પર રહેવાની તૈયારી કરી લો. કેલિફોર્નિયા સ્થિત સ્ટાર્ટઅપ કંપની 'GRU Space' એ ચંદ્ર પર વિશ્વની પ્રથમ હોટેલ બનાવવાની સત્તાવાર યોજના જાહેર કરી છે. આ માત્ર કલ્પના નથી, પણ કંપનીએ તેના માટે અરજીઓ સ્વીકારવાનું પણ શરૂ કરી દીધું છે. ૨૦૩૨ સુધીમાં આ હોટેલ તૈયાર થઈ જશે તેવી અપેક્ષા છે.
આ હોટેલનું નિર્માણ અત્યંત રોમાંચક રીતે કરવામાં આવશે. GRU સ્પેસના જણાવ્યા અનુસાર, પૃથ્વી પરથી ખાસ પ્રકારના 'ફુલાવી શકાય તેવા' (Inflatable) મોડ્યુલ્સ ચંદ્ર પર મોકલવામાં આવશે. બાકીનું બાંધકામ ચંદ્રની જ માટી (Regolith) નો ઉપયોગ કરીને રોબોટિક સિસ્ટમ દ્વારા ઈંટો બનાવીને કરવામાં આવશે. હોટેલની ડિઝાઇન સાન ફ્રાન્સિસ્કોના પ્રખ્યાત 'પેલેસ ઓફ ફાઇન આર્ટ્સ' થી પ્રેરિત હશે, જે અંતરિક્ષમાં સ્થાપત્ય કલાનો અદભૂત નમૂનો પેશ કરશે.
ચંદ્ર પર જવું એ સસ્તું તો નથી જ! આ હોટેલમાં બુકિંગ કરાવવા માટે તમારે નીચે મુજબના ખર્ચનો સામનો કરવો પડશે:
• એપ્લિકેશન ફી: ₹૯૧,૬૦૦ (નોન-રિફંડેબલ)
• પ્રારંભિક ડિપોઝિટ: $૧ મિલિયન (અંદાજે ₹૯.૧૬ કરોડ)
• કુલ અંદાજિત ખર્ચ: એક રૂમનું ભાડું $૧૦ મિલિયન (આશરે ₹૯૧.૬ કરોડ) કે તેથી વધુ હોઈ શકે છે.
શરૂઆતમાં આ સુવિધા માત્ર એવા લોકો માટે ઉપલબ્ધ હશે જેમને વ્યાપારી અવકાશ ઉડાનનો અનુભવ હોય. પ્રથમ તબક્કે માત્ર ચાર મહેમાનો જ આ હોટેલમાં રહી શકશે.
 આ પ્રોજેક્ટ પાછળ ૨૨ વર્ષના યુવાન એન્જિનિયર સ્કાયલર ચાનનો હાથ છે, જેમણે ૨૦૨૫ માં GRU સ્પેસની સ્થાપના કરી હતી. આ પ્રોજેક્ટને ઇલોન મસ્ક ધરાવતી SpaceX જેવી કંપનીઓનું પણ સમર્થન મળી રહ્યું છે. ચાન કહે છે, "હું બાળપણથી અવકાશયાત્રી બનવા માંગતો હતો, અને આજે હું સામાન્ય લોકો માટે અંતરિક્ષના દરવાજા ખોલી રહ્યો છું."
ચંદ્ર પરની આ હોટેલના રૂમની બારીમાંથી જ્યારે તમે પૃથ્વીને એક વાદળી ગોળા તરીકે જોશો, ત્યારે તે અનુભવ ખરેખર અવિસ્મરણીય હશે. આ પ્રોજેક્ટ માનવ ઇતિહાસમાં પ્રવાસન ક્ષેત્રે એક નવી ક્રાંતિ લાવવા જઈ રહ્યો છે