ઈરાનમાં સરકાર વિરોધી દેખાવો વચ્ચે ક્રૂર દમનઃ ૩૫૦ કલાક - બે સપ્તાહથી ઈન્ટરનેટ સેવાઓ સંપૂર્ણ ઠપ્પઃ રસ્તાઓ પર મહિલાઓ સુરક્ષિત નથી
ટ્રમ્પ ઈરાન પર પ્રારંભિક હવાઈ હુમલાઓ તો કરી શકે છે, પરંતુ લાંબા ગાળાના સંઘર્ષમાં રસ ન હોવાને કારણે અધવચ્ચેથી પીછેહઠ કરી લેશે તેવો ઈઝરાયેલને ડરઃ જો અમેરિકા હુમલો કરીને રસ ગુમાવી દેશે, તો યુદ્ધના ભયાનક પરિણામોનો સામનો કરવા માટે ઈઝરાયેલ એકલું પડી જશે
તેલઅવીવ/વોશિંગ્ટન,તા.૨૪: ઈરાનમાં ચાલી રહેલા સરકાર વિરોધી આંદોલનોને ડામી દેવા માટે શાસકોએ દેશને ડિજિટલ અંધારપટમાં ધકેલી દીધો છે. છેલ્લા ૩૫૦ કલાકથી સમગ્ર દેશમાં ઈન્ટરનેટ બ્લેકઆઉટ છે ત્યારે રસ્તાઓ પર સુરક્ષા દળો દ્વારા મહિલાઓ પર થઈ રહેલા મહાભયાનક અત્યાચારના વિડીયો સ્ટારલિક મારફતે બહાર આવી રહ્યા છે.
આ આંતરિક અશાંતિ વચ્ચે અમેરિકી પ્રમુખ ડોનાલ્ડ ટ્રમ્પ ઈરાન પર હુમલો કરે તેવી શક્યતા છે, પરંતુ ઈઝરાયેલને ડર છે કે અમેરિકા અધવચ્ચેથી પીછેહઠ કરી જશે.
ઈરાનમાં વર્તમાન સમયમાં સ્થિતિ અત્યંત સ્ફોટક બની ગઈ છે. સરકાર વિરોધી અવાજોને દબાવવા માટે ઈરાની શાસને સમગ્ર દેશમાં અભૂતપૂર્વ કોમ્યુનિકેશન બ્લેકઆઉટ લાદી દીધું છે. છેલ્લા બે અઠવાડિયાથી પણ વધુ સમયથી, એટલે કે સતત ૩૫૦ કલાકથી ઈરાનમાં સેલ્યુલર સર્વિસ, મોબાઈલ ડેટા અને બ્રોડબેન્ડ સહિતની તમામ ઈન્ટરનેટ સેવાઓ સંપૂર્ણપણે બંધ કરી દેવામાં આવી છે. આ ડિજિટલ અંધારપટને કારણે ઈરાનની પ્રજા બાહ્ય દુનિયાથી કપાઈ ગઈ છે. જોકે, આ કડક પ્રતિબંધો વચ્ચે પણ 'સ્ટારલિક' સેટેલાઇટ ઈન્ટરનેટના માધ્યમથી કેટલાક ચોંકાવનારા સમાચારો અને વિડીયો બહાર આવી રહ્યા છે જે ત્યાંની ગંભીર પરિસ્થિતિનો ચિતાર આપે છે.
તાજેતરમાં જ તહેરાનથી એક સીસીટીવી ફૂટેજ સામે આવ્યું છે, જેમાં ઈસ્લામિક રિવોલ્યુશનરી ગાર્ડ કોર્પ્સ (આઈઆરજીસી) ની અર્ધલશ્કરી પાંખ ગણાતી ‘બાસીજ ફોર્સ'ના સભ્યોની ક્રૂરતા સ્પષ્ટ દેખાય છે. સાદા વેશમાં રહેલા આ ઓપરેટિવ્સ અને સુરક્ષાકર્મીઓ એક મહિલાને ઘેરી વળ્યા હતા અને તેના પર લાકડીઓ તેમજ તીક્ષ્ણ હથિયારો વડે નિર્દયતાથી હુમલો કર્યો હતો. આ ઘટના ઈરાનમાં ચાલી રહેલા ક્રેકડાઉન અને માનવાધિકાર હનનની ગંભીરતા દર્શાવે છે.
બીજી તરફ, આંતરરાષ્ટ્રીય મોરચે પણ ઈરાન માટે મુસીબતો વધી રહી છે. હિબ્રુ અખબાર 'મારિવ ઓનલાઈન' ના અહેવાલ મુજબ, ઈઝરાયેલના વરિષ્ઠ અધિકારીઓ અમેરિકી રાષ્ટ્રપતિ ડોનાલ્ડ ટ્રમ્પની ઈરાન પ્રત્યેની સંભવિત સૈન્ય કાર્યવાહીને લઈને ચિતિત છે.
ઈઝરાયેલી સંરક્ષણ સૂત્રોનું માનવું છે કે ટ્રમ્પ ઈરાન પર પ્રારંભિક હવાઈ હુમલાઓ તો કરી શકે છે, પરંતુ તેઓ લાંબા ગાળાના સંઘર્ષમાં રસ ન હોવાને કારણે અધવચ્ચેથી પીછેહઠ કરી લેશે. ઈઝરાયેલને ડર છે કે જો અમેરિકા હુમલો કરીને પછી રસ ગુમાવી દેશે, તો ઈરાનનો બદલો અને યુદ્ધના ભયાનક પરિણામોનો સામનો કરવા માટે ઈઝરાયેલને એકલા રહી જવું પડશે. આમ, ઈરાન હાલમાં આંતરિક વિદ્રોહ અને બાહ્ય યુદ્ધના ભય એમ બેવડા સંકટનો સામનો કરી રહ્યું છે.
(10:16 AM IST)
છેલ્લા 8 દિવસમાં સૌથી લોકપ્રિય 
