કટક: ઓડિશાના સંબલપુરમાં રહેતા ૭૫ વર્ષીય બાબુ લોહારે સાબિત કરી દીધું છે કે સાચો પ્રેમ માત્ર ફિલ્મોમાં જ નહીં, પણ વાસ્તવિક જીવનમાં પણ અશક્યને શક્ય બનાવી શકે છે. પોતાની ૭૦ વર્ષીય લકવાગ્રસ્ત પત્ની જ્યોતિની સારવાર કરાવવા માટે જ્યારે તેમની પાસે એમ્બ્યુલન્સના પૈસા નહોતા, ત્યારે આ વયોવૃદ્ધ વ્યક્તિએ હાર માનવાને બદલે રિક્ષાનો હાથ પકડ્યો અને ૩૦૦ કિલોમીટર દૂર કટક પહોંચવા નીકળી પડ્યા હતા.
 સંબલપુરના મોદીપાડાના રહેવાસી બાબુ લોહારની પત્ની લકવાગ્રસ્ત થતા ડોક્ટરોએ તેમને કટકની SCB મેડિકલ કોલેજમાં લઈ જવા સલાહ આપી હતી. ગરીબી અને કોઈનો ટેકો ન હોવા છતાં, બાબુ લોહારે પોતાની પત્નીને રિક્ષામાં બેસાડી અને ધોમધખતા તાપ તેમજ શારીરિક નબળાઈની પરવા કર્યા વગર રિક્ષા ખેંચવાનું શરૂ કર્યું. તેમની આ સફર કોઈ પર્વત કાપવા જેવી જ કઠિન હતી, પરંતુ પત્નીને બચાવવાની જીદ તેમને આગળ વધારતી રહી.
કટકમાં સારવાર કરાવીને પરત ફરતી વખતે ચૌદ્વાર પાસે એક અજાણ્યા વાહને તેમની રિક્ષાને ટક્કર મારી હતી, જેમાં જ્યોતિ ગંભીર રીતે ઘાયલ થઈ હતી. ટાંગી હેલ્થ સેન્ટરના ડો. વિકાસે આ વૃદ્ધ દંપતીની દયનીય હાલત જોઈને ન માત્ર મફત સારવાર કરી, પણ આર્થિક મદદ પણ કરી હતી. ડોક્ટરની માનવતા જોઈને બાબુ લોહારની આંખો ભરાઈ આવી હતી અને તેમણે ગૂંગળામણભર્યા અવાજે કહ્યું હતું કે, “અમારું દુનિયામાં કોઈ નથી, અમે બંને જ એકબીજાનો સહારો છીએ.”
બાબુ લોહારની આ હૃદયદ્રાવક વાર્તા સોશિયલ મીડિયા પર વાયરલ થતા લોકો તેમને ‘ઓડિશાના દશરથ માંઝી’ કહી રહ્યા છે. આ વાર્તા શીખવે છે કે જો સંકલ્પ અને પ્રેમ સાચો હોય, તો ઉંમર કે સંસાધનો ક્યારેય આડા આવતા નથી. આજે આખું ઓડિશા આ વૃદ્ધ પ્રેમીના અદમ્ય સાહસને સલામ કરી રહ્યું છે.