તેહરાન/વોશિંગ્ટન:મધ્ય પૂર્વમાં તણાવ અત્યારે તેની ચરમસીમાએ પહોંચી ગયો છે. ઈરાને વિશ્વને ચોંકાવનારી ચેતવણી આપતા સ્પષ્ટ કર્યું છે કે, જો તેના પર કોઈ પણ પ્રકારનો હુમલો કરવામાં આવશે, તો તેને માત્ર મર્યાદિત કાર્યવાહી નહીં પરંતુ ‘સંપૂર્ણ યુદ્ધ’ (All-out War) માનવામાં આવશે. ઈરાની અધિકારીઓએ જણાવ્યું છે કે હુમલો ભલે સર્જિકલ સ્ટ્રાઈક હોય કે અન્ય કોઈ રીતે, તેનો જવાબ સૌથી ભયાનક રીતે આપવામાં આવશે.
અમેરિકી પ્રમુખ ડોનાલ્ડ ટ્રમ્પે જાહેરાત કરી છે કે અમેરિકાનંત શક્તિશાળી નૌકાદળ (આર્મડા) ઈરાન તરફ આગળ વધી રહ્યું છે. ટ્રમ્પે ઈરાનને કડક શબ્દોમાં ચેતવણી આપી છે કે તેઓ પોતાના પરમાણુ કાર્યક્રમને ફરીથી શરૂ ન કરે અથવા કોઈ પણ પ્રકારની ઉશ્કેરણીજનક કાર્યવાહી ન કરે. જોકે, ટ્રમ્પે એવી આશા પણ વ્યક્ત કરી છે કે આ સૈન્ય શક્તિનો ઉપયોગ કરવાની જરૂર નહીં પડે.
 ઈરાનના વરિષ્ઠ લશ્કરી અધિકારીઓએ નામ ન આપવાની શરતે જણાવ્યું છે કે સમગ્ર દેશમાં હાઈ એલર્ટ જાહેર કરી દેવામાં આવ્યું છે. ઈરાને કહ્યું છે કે જો અમેરિકા તેમની સાર્વભૌમત્વનું ઉલ્લંઘન કરશે, તો ઈરાન પોતાના તમામ સંસાધનો અને શક્તિનો ઉપયોગ કરીને જવાબ આપશે. ગયા વર્ષે ઈરાનના પરમાણુ પ્લાન્ટ્સ પર થયેલા હુમલા બાદ અમેરિકાએ આ વખતે જે રીતે લશ્કરી જમાવટ કરી છે, તેનાથી આંતરરાષ્ટ્રીય બજારમાં તેલના ભાવ અને વૈશ્વિક શાંતિ પર મોટું જોખમ ઊભું થયું છે.
નિષ્ણાતો માને છે કે જો આ વખતે સંઘર્ષ શરૂ થશે તો તે માત્ર બે દેશો પૂરતો મર્યાદિત નહીં રહે, પરંતુ સમગ્ર વિશ્વને તેની લપેટમાં લઈ લેશે. અમેરિકા આ સૈન્ય જમાવટને ‘રક્ષણાત્મક’ ગણાવી રહ્યું છે, જ્યારે ઈરાન તેને સીધા યુદ્ધની તૈયારી માની રહ્યું છે. આ સ્થિતિએ ફરી એકવાર બીજા વિશ્વયુદ્ધ પછીની સૌથી ગંભીર સુરક્ષા કટોકટી ઊભી કરી છે.