નવી દિલ્હી:  ભારતના 77મા પ્રજાસત્તાક દિવસની ઉજવણી આ વર્ષે વૈશ્વિક રાજનીતિના નવા આયામો સર કરવા જઈ રહી છે. યુરોપિયન કમિશનના પ્રમુખ ઉર્સુલા વોન ડેર લેયેન શનિવારે બે દિવસીય ભારત મુલાકાતે નવી દિલ્હી પહોંચ્યા છે, જ્યાં વાણિજ્ય અને ઉદ્યોગ રાજ્યમંત્રી જિતિન પ્રસાદાએ તેમનું ઉષ્માભર્યું સ્વાગત કર્યું હતું. તેમની સાથે યુરોપિયન કાઉન્સિલના પ્રમુખ એન્ટોનિયો લુઇસ સાન્તોસ દા કોસ્ટા પણ ખાસ ઉપસ્થિત રહ્યા છે. કર્તવ્ય પથ પર પરેડ નિહાળવા માટે પહેલીવાર EU ના બે ટોચના નેતાઓને સંયુક્ત રીતે આમંત્રણ આપીને ભારતે યુરોપ સાથેના પોતાના વ્યૂહાત્મક સંબંધોને એક નવી ઊંચાઈ પર પહોંચાડી દીધા છે.

આ મુલાકાત માત્ર શિષ્ટાચાર પૂરતી મર્યાદિત નથી, પરંતુ તેની પાછળ એક મોટું આર્થિક અને સુરક્ષાલક્ષી લક્ષ્ય છુપાયેલું છે. 27 જાન્યુઆરીએ યોજાનારી ભારત-EU સમિટમાં ‘મુક્ત વેપાર કરાર’ (FTA) ને આખરી ઓપ આપવામાં આવે તેવી પૂરેપૂરી સંભાવના છે. આ કરારથી ભારત અને યુરોપના 2 અબજ લોકો માટે વેપારના નવા દ્વાર ખુલશે, જે વૈશ્વિક GDP ના ચોથા ભાગ જેટલો હિસ્સો ધરાવે છે. એસ્ટોનિયાના પૂર્વ પીએમ કાજા કલ્લાસે પણ સંકેત આપ્યો છે કે આ સમિટમાં એક નવી સુરક્ષા અને સંરક્ષણ ભાગીદારી પર હસ્તાક્ષર કરવામાં આવશે, જે રશિયા અને ચીન પરની નિર્ભરતા ઘટાડવામાં બંને પક્ષોને મદદરૂપ થશે.

નિષ્ણાતો માને છે કે જો FTA પર મહોર વાગે છે, તો તે ભારત માટે આર્થિક ક્રાંતિ સમાન સાબિત થશે. તેનાથી ટેકનોલોજી ટ્રાન્સફર, રોકાણ અને રોજગારીની નવી તકો ઉભી થશે. ભારત અને EU આર્થિક સ્થિરતા અને મજબૂત સપ્લાય ચેઈન બનાવવા માટે એક સમાન વિઝન ધરાવે છે. ખાસ કરીને જ્યારે વૈશ્વિક સ્તરે વેપારના ક્ષેત્રમાં દબાણ વધી રહ્યું છે, ત્યારે આ ભાગીદારી એક વ્યૂહાત્મક નિર્ણય તરીકે ઉભરી આવશે. પ્રજાસત્તાક દિવસની આ ભવ્ય ઉજવણી બાદ ભારત-EU સંબંધોમાં જે નવું પ્રકરણ લખાશે, તેના પર સમગ્ર વિશ્વની નજર ટકેલી છે.