મનાલી/શ્રીનગર: દેશના ઉત્તરીય પહાડી રાજ્યોમાં કુદરત જાણે રૌદ્ર મિજાજમાં છે. મનાલી, ગુલમર્ગ અને મસૂરી જેવા લોકપ્રિય પર્યટન સ્થળો હાલમાં સફેદ બરફની જાડી ચાદર નીચે ઢંકાઈ ગયા છે. આ નયનરમ્ય દ્રશ્યો જે પ્રવાસીઓને આકર્ષી રહ્યા હતા, તે જ હવે તેમના માટે મોટી મુસીબત બની ગયા છે. હિમાચલ પ્રદેશમાં સ્થિતિ એટલી ગંભીર છે કે 685 જેટલા મુખ્ય રસ્તાઓ વાહનવ્યવહાર માટે સંપૂર્ણપણે બંધ કરી દેવાયા છે. હોટલો હાઉસફુલ છે અને સેંકડો વાહનો બરફના થર વચ્ચે ફસાઈ જતાં પ્રવાસીઓ કલાકો સુધી રસ્તા પર ભૂખ્યા-તરસ્યા બેસી રહેવા મજબૂર બન્યા છે.
જમ્મુ-કાશ્મીરમાં પણ કુદરતનો પ્રકોપ યથાવત છે, જ્યાં વિશ્વપ્રસિદ્ધ સ્કી રિસોર્ટ ગુલમર્ગમાં પારો ગગડીને માઈનસ 12 ડિગ્રી સેલ્સિયસ સુધી પહોંચી ગયો છે. જમ્મુ-શ્રીનગર નેશનલ હાઇવે (NH-44) સતત બીજા દિવસે બંધ રહેતા કાશ્મીર ખીણનો સંપર્ક દેશના બાકીના ભાગોથી કપાઈ ગયો છે. ઉધમપુરના જખાની પાસે સેંકડો ટ્રકો અને પ્રવાસીઓના વાહનોની લાંબી કતારો લાગી છે. વહીવટીતંત્રે પટનીટોપ જતા પ્રવાસીઓ માટે કડક નિયમો લાગુ કર્યા છે, જેમાં હોટેલ બુકિંગ અને આઈડી ચેક કર્યા પછી જ મર્યાદિત અવરજવરની મંજૂરી આપવામાં આવી રહી છે.
હિમાચલના પ્રવાસન હબ ગણાતા મનાલી અને શિમલામાં સ્થિતિ વધુ કપરી બની છે. શનિવારે પ્રવાસીઓ આઠ-આઠ કલાક સુધી ટ્રાફિક જામમાં ફસાયેલા જોવા મળ્યા હતા. શિમલાથી માત્ર 10 કિમી દૂર ઢલ્લી પાસે ટ્રાફિક થંભી જતાં લોકોની હાલત કફોડી થઈ ગઈ હતી. હિન્દુસ્તાન-તિબેટ રોડ પર બરફ એટલો વધારે છે કે વાહનોના ટાયર લપસી રહ્યા છે, જેના કારણે પ્રશાસને સુરક્ષાના ભાગરૂપે રસ્તાઓ સીલ કરી દીધા છે. મનાલી પાસે 100 થી વધુ ગાડીઓ રસ્તાની વચ્ચે જ બરફમાં દટાઈ ગઈ હોવાના અહેવાલો છે.
આ સંકટના સમયે ભારતીય સેના અને સ્થાનિક પ્રશાસન દેવદૂત બનીને સામે આવ્યા છે. ઠંડીથી ઠરતા પ્રવાસીઓ માટે સુરક્ષિત આશ્રયસ્થાનો અને ગરમ ભોજનની વ્યવસ્થા કરવામાં આવી રહી છે. હવામાન વિભાગની આગાહી મુજબ હજુ આગામી થોડા દિવસો સુધી હિમવર્ષા ચાલુ રહેવાની શક્યતા છે, જેને પગલે પ્રવાસીઓને બિનજરૂરી મુસાફરી ટાળવા અને પહાડી વિસ્તારોમાં જવાનું ટાળવા સખત સૂચના આપવામાં આવી છે. હાલમાં પહાડો પર 'વ્હાઇટ આઉટ' જેવી સ્થિતિ છે, જ્યાં નજર પહોંચે ત્યાં માત્ર બરફ જ બરફ દેખાઈ રહ્યો છે.