પટણા: બિહારના રાજકારણમાં વર્ષોથી જેની રાહ જોવાતી હતી તે ઘડી આખરે આવી ગઈ છે, પરંતુ તેની સાથે જ યાદવ પરિવારમાં 'મહાભારત'ના મંડાણ પણ થયા છે. પટણાની આલીશાન હોટેલ મૌર્ય ખાતે મળેલી RJDની હાઈપ્રોફાઈલ રાષ્ટ્રીય કાર્યકારિણીની બેઠકમાં લાલુ પ્રસાદ યાદવે એક મોટો દાવ ખેલતા તેજસ્વી યાદવને પાર્ટીના રાષ્ટ્રીય કાર્યકારી અધ્યક્ષ તરીકે નિયુક્ત કર્યા છે. આ નિર્ણય સાથે જ તે સ્પષ્ટ થઈ ગયું છે કે હવે RJDનું ભવિષ્ય અને તેની લગામ સત્તાવાર રીતે તેજસ્વીના હાથમાં છે. જોકે, આ ખુશીના અવસરે ઘરના આંગણે જ વિરોધનો વંટોળ ફૂંકાયો છે.

પક્ષમાં તેજસ્વીના વધતા કદથી તેમની બહેન રોહિણી આચાર્ય નારાજ હોવાનું સ્પષ્ટ દેખાઈ રહ્યું છે. રોહિણીએ પોતાના સોશિયલ મીડિયા હેન્ડલ પર નામ લીધા વિના જે રીતે પ્રહારો કર્યા છે, તેણે સમગ્ર દેશનું ધ્યાન ખેંચ્યું છે. રોહિણીએ આ રાજ્યાભિષેકને "કઠપૂતળીમાંથી રાજકુમાર બનેલા" વ્યક્તિનો સત્તા ગ્રહણ સમારોહ ગણાવ્યો છે. રોહિણીની આ ટિપ્પણી માત્ર એક ફેમિલી ડ્રામા નથી, પરંતુ તે RJDની અંદર ચાલી રહેલી આંતરિક ખેંચતાણ અને ભવિષ્યમાં સર્જાનારા સત્તાના નવા સમીકરણો તરફ ઈશારો કરે છે.

આ મહત્વપૂર્ણ બેઠકમાં દેશભરના વિવિધ રાજ્યોના એકમોના પ્રદેશ પ્રમુખો, સાંસદો, ધારાસભ્યો અને વિધાન પરિષદના સભ્યો હાજર રહ્યા હતા. લાલુ પ્રસાદ યાદવે સ્વાસ્થ્યના કારણોસર સક્રિય રાજકારણમાંથી આંશિક રીતે ખસીને તેજસ્વીને આગળ કર્યા છે, પરંતુ રોહિણી આચાર્યની પોસ્ટ મુજબ આ "રાજકારણના ટોચના માણસની ભવ્ય ઇનિંગ્સનો અંત" છે. રોહિણીએ ખુશામતખોરો અને પક્ષમાં ઘૂસેલા નવા તત્વો પર નિશાન સાધીને સંકેત આપ્યો છે કે તેજસ્વી માટે આ સફર કાંટાની પથારી સાબિત થઈ શકે છે.

બિહારમાં આગામી ચૂંટણીઓ પહેલા તેજસ્વી યાદવનું આ પ્રમોશન વિપક્ષો માટે પણ ચર્ચાનો વિષય બન્યું છે. એક તરફ તેજસ્વી પોતાની યુવા છબી સાથે જનતા વચ્ચે જવાની તૈયારી કરી રહ્યા છે, ત્યારે બીજી તરફ પરિવારમાં લાગેલી આ આગ કેવી રીતે ઠરશે તે જોવું રહ્યું. રોહિણીએ જે રીતે "કઠપૂતળી રાજકુમાર" શબ્દનો પ્રયોગ કર્યો છે, તે આગામી દિવસોમાં વિપક્ષી દળો માટે પણ તેજસ્વીને ઘેરવા માટેનું એક મોટું હથિયાર બની શકે છે.