રાજકોટ: આવતીકાલથી શરૂ થતું નવું સપ્તાહ બેંકિંગ સેવાઓ માટે ભારે કટોકટીભર્યું સાબિત થઈ શકે છે. સોમવાર, ૨૬ જાન્યુઆરીના રોજ દેશભરમાં ૭૭મા પ્રજાસત્તાક દિવસની ભવ્ય ઉજવણી હોવાથી તમામ સરકારી અને ખાનગી બેંકોમાં રાષ્ટ્રીય રજા રહેશે. બંધારણના અમલીકરણના ૭૬ વર્ષ પૂર્ણ થવાના આ અવસરે તમામ ફિઝિકલ બ્રાન્ચો સત્તાવાર રીતે બંધ રહેશે. જોકે, મુશ્કેલી ત્યાં પૂરી નથી થતી, કારણ કે રજાના બીજા જ દિવસે એટલે કે મંગળવારે બેંક કર્મચારીઓએ પોતાની પડતર માંગણીઓ મુદ્દે આરપારની લડાઈ લડવાનું એલાન કર્યું છે.

૨૭ જાન્યુઆરી, મંગળવારના રોજ બેંક યુનિયનો દ્વારા પાંચ દિવસના વર્ક શિડ્યુલ (5-Day Week) ની માંગણી સાથે હડતાળ પર ઉતરવાની પૂરેપૂરી શક્યતા છે. છેલ્લા બે વર્ષથી ભારતીય બેંક સંગઠનનો આ પ્રસ્તાવ સરકાર પાસે વિચારાધીન છે, પરંતુ હજુ સુધી કોઈ નક્કર ઉકેલ ન આવતા કર્મચારીઓમાં રોષ જોવા મળી રહ્યો છે. જો આ હડતાળ સફળ રહેશે, તો જાહેર ક્ષેત્રની મોટાભાગની બેંકોમાં સતત બીજા દિવસે પણ તાળા લટકશે, જેના કારણે ચેક ક્લિયરન્સ અને કેશ ટ્રાન્ઝેક્શન જેવા મહત્વના કામો અટવાઈ શકે છે.

બેંક યુનિયનોનું તર્ક છે કે પાંચ દિવસના કાર્ય સપ્તાહથી કર્મચારીઓની કાર્યક્ષમતા વધશે અને માનસિક દબાણ ઘટશે. રવિવાર અને માત્ર બીજા-ચોથા શનિવારની રજાના હાલના નિયમ સામે યુનિયનોએ દરરોજ ૪૦ મિનિટ વધારાનું કામ કરવાની પણ તૈયારી બતાવી છે. જોકે, રાહતની વાત એ છે કે HDFC, ICICI અને કોટક મહિન્દ્રા જેવી મોટી ખાનગી બેંકોની કામગીરી પર આ હડતાળની અસર ઓછી પડવાની સંભાવના છે. આમ છતાં, સરકારી બેંકોના લાખો ગ્રાહકો માટે મંગળવારનો દિવસ મુશ્કેલીભર્યો બની શકે છે.

બેંકિંગ સેવાઓ ખોરવાવાની આશંકા વચ્ચે નિષ્ણાતો ગ્રાહકોને ડિજિટલ પ્લેટફોર્મનો ઉપયોગ કરવાની સલાહ આપી રહ્યા છે. ભલે બેંકોની ભૌતિક શાખાઓ બંધ હોય, પરંતુ એટીએમ (ATM), યુપીઆઈ (UPI) અને ઈન્ટરનેટ બેંકિંગ જેવી ઓનલાઈન સેવાઓ અવિરત ચાલુ રહેશે. ૨૬ અને ૨૭ જાન્યુઆરીના આ સંભવિત 'લોકડાઉન' બાદ ગ્રાહકોએ ૧ ફેબ્રુઆરી, રવિવારની રજાનું પણ ધ્યાન રાખવું પડશે. જો તમારું કોઈ અગત્યનું કામ બાકી હોય, તો આ રજાઓ અને હડતાળને ધ્યાનમાં રાખીને વહેલી તકે આયોજન કરી લેવું હિતાવહ છે.