ગાઝિયાબાદ: ઉત્તર પ્રદેશના ગાઝિયાબાદમાં તંત્રની નરી બેદરકારીએ એક હસતા-રમતા પરિવારનો ચિરાગ ઓલવી નાખ્યો છે. મસૂરી પોલીસ સ્ટેશન વિસ્તારના ઝુંડપુરા ગામમાં ૧૧ વર્ષનો એક માસૂમ છોકરો રસ્તા કિનારે આવેલી ખુલ્લી ગટરમાં પડી જતાં તેનું કરૂણ મોત નીપજ્યું છે. આ સમગ્ર હૃદયદ્રાવક ઘટના નજીકમાં લાગેલા સીસીટીવી કેમેરામાં કેદ થઈ ગઈ છે, જેમાં સ્પષ્ટ જોઈ શકાય છે કે કઈ રીતે એક નાનકડી ભૂલ અને વહીવટી તંત્રની આળસ એક જિંદગી પર ભારે પડી ગઈ. આ ઘટના બાદ સમગ્ર વિસ્તારમાં શોકનું મોજું ફરી વળ્યું છે અને સ્થાનિક લોકોમાં ભારે રોષ જોવા મળી રહ્યો છે.

સીસીટીવી ફૂટેજ મુજબ, બાળક ગટર પાસે ઊભો હતો ત્યારે અચાનક તેનું સંતુલન બગડ્યું અને તે સીધો ગંદા પાણીમાં ખાબક્યો હતો. ગટર માત્ર એક ફૂટ જેટલી જ ઊંડી હતી, પરંતુ કમનસીબે બાળક ઊંધા મોઢે પાણીમાં પડ્યું હતું. માત્ર બે મિનિટ સુધી પાણીમાં ડૂબેલા રહેવાને કારણે શ્વાસ રુંધાવાથી તેનું ઘટનાસ્થળે જ મોત નીપજ્યું હતું. ગ્રામજનોનો આક્ષેપ છે કે આ ગટર લાંબા સમયથી ખુલ્લી છે અને તેની સફાઈ ન થતી હોવાથી ગંદુ પાણી રસ્તાઓ પર ફરી વળે છે, જેના કારણે લપસી પડવાનો ભય સતત રહેતો હોય છે.

આ ગંભીર ઘટના બાદ પંચાયત વિભાગના અધિકારીઓના નિવેદને લોકોના ઘા પર મીઠું ભભરાવવાનું કામ કર્યું છે. ADO પંચાયત અમિત પાંડેએ એવું કહીને જવાબદારી ટાળવાનો પ્રયાસ કર્યો કે ગટર બહુ ઊંડી નથી અને બાળકના પરિવારને વાઈ (ખેંચ) આવવાની બીમારી હોવાનો દાવો કર્યો છે. અધિકારીઓના મતે બાળકની બીમારીને કારણે આ મોત થયું હોઈ શકે છે, જ્યારે ગ્રામજનો સ્પષ્ટપણે કહે છે કે જો ગટર પર ઢાંકણ હોત તો ગમે તેવી સ્થિતિમાં પણ બાળક અંદર પડત જ નહીં. તંત્રની આ બચાવની મુદ્રાએ લોકોમાં આક્રોશ વધુ તેજ કર્યો છે.

બીજી તરફ, ગાઝિયાબાદ પોલીસે આ મામલે હજુ સુધી કોઈ સત્તાવાર ગુનો દાખલ કર્યો નથી. પોલીસનું કહેવું છે કે તેમને હજુ સુધી કોઈ ઔપચારિક ફરિયાદ મળી નથી. જોકે, સોશિયલ મીડિયા પર વાયરલ થયેલા સીસીટીવી ફૂટેજ જોઈને લોકો વહીવટી તંત્ર પર ફિટકાર વરસાવી રહ્યા છે. સવાલ એ ઊભો થાય છે કે શું દરેક દુર્ઘટના બાદ તપાસના નામે માત્ર કાગળો જ ઘોળાશે કે પછી ખુલ્લી ગટરો પર ઢાંકણા લગાવીને અન્ય કોઈ માસૂમનો જીવ બચાવવા માટે નક્કર કાર્યવાહી કરવામાં આવશે?