મેડચલ-મલકાજગિરી: તેલંગાણાના મેડચલ-મલકાજગિરી જિલ્લામાં આવેલી એક કન્યા છાત્રાલયમાં વહેલી સવારે જ્યારે વિદ્યાર્થિનીઓ ગાઢ નિદ્રામાં હતી, ત્યારે કાળમુખા એસી યુનિટમાં જોરદાર વિસ્ફોટ થયો હતો. સવારે આશરે 4:40 વાગ્યે થયેલા આ પ્રચંડ ધડાકાને કારણે આખી હોસ્ટેલ ધ્રૂજી ઉઠી હતી. પ્રાથમિક તપાસ મુજબ, શોર્ટ સર્કિટને કારણે એસીમાં સ્પાર્ક થયો અને જોતજોતામાં યુનિટ ફાટતા આખા રૂમમાં ઝેરી ધુમાડાના સામ્રાજ્ય સાથે આગ ફેલાઈ ગઈ હતી.
ઘટના એટલી અચાનક અને ભયાનક હતી કે રૂમમાં સૂઈ રહેલી છ છોકરીઓને બચવાનો મોકો પણ ન મળ્યો. ઝેરી ધુમાડો શ્વાસમાં ભરાઈ જવાથી તમામ છ વિદ્યાર્થિનીઓ રૂમની અંદર જ બેભાન અવસ્થામાં મળી આવી હતી. ફાયર બ્રિગેડની ટીમ ઘટનાસ્થળે પહોંચે તે પહેલા જ સ્થાનિક રહીશોએ અપ્રતિમ સાહસ બતાવી આગ પર કાબૂ મેળવવાનો પ્રયાસ શરૂ કરી દીધો હતો, જેના કારણે મોટી જાનહાનિ ટળી હતી પરંતુ વિદ્યાર્થિનીઓની હાલત ગંભીર જણાતા તેમને તાત્કાલિક હોસ્પિટલ ખસેડવામાં આવી હતી.
ફાયર વિભાગના ઉચ્ચ અધિકારીઓના જણાવ્યા અનુસાર, 'નાઈન એજ્યુકેશન' નામની આ હોસ્ટેલમાં સુરક્ષાના ધારાધોરણો અને વાયરિંગની સ્થિતિ તપાસનો વિષય છે. હોસ્પિટલના આઈસીયુ વોર્ડમાં સારવાર લઈ રહેલી વિદ્યાર્થિનીઓની સ્થિતિ અત્યારે નાજુક હોવાનું જાણવા મળી રહ્યું છે. ધુમાડાની તીવ્રતા એટલી વધારે હતી કે ફેફસામાં કાર્બન મોનોક્સાઈડ ભરાઈ જવાથી છોકરીઓ ગૂંગળામણનો શિકાર બની હતી, જે હાલ મેડિકલ ટીમ માટે ચિંતાનો વિષય છે.
ઉલ્લેખનીય છે કે હૈદરાબાદના નામપલ્લીમાં ફર્નિચરની દુકાનમાં લાગેલી આગમાં પાંચ લોકોના મોતની શાહી હજુ સુકાઈ નથી ત્યાં આ બીજી મોટી દુર્ઘટનાએ પ્રશાસનની ઊંઘ હરામ કરી દીધી છે. નામપલ્લીમાં થયેલી બેદરકારી જેવી જ સ્થિતિ અહીં પણ હોવાની આશંકા સેવાઈ રહી છે. હાલમાં પોલીસ અને ફાયર વિભાગ દ્વારા હોસ્ટેલમાં થયેલા આર્થિક નુકસાન અને ઇલેક્ટ્રિક ફિટિંગની ગુણવત્તા બાબતે સઘન તપાસ શરૂ કરવામાં આવી છે.