કાશ્મીર ખીણમાં આજે રવિવારે અનેક વિસ્તારોમાં હળવી થી મધ્યમ હિમવર્ષા નોંધાઈ હતી, જેના કારણે જનજીવન અને વાહનવ્યવહાર પર અસર પડી છે. 

ભારતીય હવામાન વિભાગના જણાવ્યા અનુસાર, એક નવું વેસ્ટર્ન ડિસ્ટર્બન્સ સક્રિય થવાને કારણે આવતીકાલે ૨૬મી જાન્યુઆરીથી જમ્મુ-કાશ્મીરના મોટાભાગના વિસ્તારોમાં વરસાદ અને ભારે હિમવર્ષા થવાની પ્રબળ સંભાવના છે. 

હવામાન વિભાગે ખાસ કરીને ૨૬મી જાન્યુઆરીની રાત અને ૨૭મી જાન્યુઆરીની સાંજને અત્યંત મહત્વપૂર્ણ ગણાવી છે અને કેટલાક લોકો તેને 'કયામતની રાત' તરીકે પણ વર્ણવી રહ્યા છે, કારણ કે આ સમયગાળા દરમિયાન ખીણ અને પહાડી વિસ્તારોમાં મધ્યમથી ભારે વરસાદ અને બરફવર્ષાની સાથે ગાજવીજ અને તેજ પવનો ફૂંકાવાની શક્યતા છે.

છેલ્લા ૨૪ કલાકમાં કાશ્મીરના અનેક ભાગોમાં વરસાદ અને બરફવર્ષા થઈ છે, જેમાં ઊંચાઈવાળા વિસ્તારોમાં ભારે બરફના થર જામી ગયા હોવાના અહેવાલ છે.

આજે રવિવારે થયેલી હળવી થી મધ્યમ હિમવર્ષાને કારણે સડક અને રેલ વ્યવહાર ખોરવાયો હતો. રેલવે અધિકારીઓએ સાવચેતીના ભાગરૂપે બારામુલાથી બનીહાલ રેલ સેક્શન પર દોડતી કેટલીક ટ્રેનો રદ કરવી પડી હતી. જેમાં ટ્રેન નંબર ૭૪૬૨૬, જે બારામુલાથી બનીહાલ માટે સવારે ૭ વાગ્યે રવાના થવાની હતી, તેને ખરાબ હવામાનને કારણે બડગામ ખાતે જ અટકાવી દેવામાં આવી હતી. 

હવામાન વિભાગે ખેડૂતોને ખેતીવાડીની પ્રવૃત્તિઓ હાલ પૂરતી સ્થગિત રાખવા અને ઊંચાઈવાળા વિસ્તારોમાં રહેતા લોકોને સાવચેતી રાખવા ખાસ સૂચના આપી છે.

જોકે, રાહતની વાત એ છે કે શ્રીનગર ઇન્ટરનેશનલ એરપોર્ટ પર ફ્લાઈટ ઓપરેશન સામાન્ય રીતે ચાલુ રહ્યું છે. 

એરપોર્ટ ડાયરેક્ટર જાવેદ અંજુમના જણાવ્યા મુજબ, તાજી હિમવર્ષાને કારણે કોઈ પણ ફ્લાઈટ રદ કરવામાં આવી નથી અને વિમાનોની અવરજવર રાબેતા મુજબ છે. 

જોકે, તેમણે સ્પષ્ટતા કરી હતી કે પ્રજાસત્તાક દિવસની સુરક્ષાને ધ્યાનમાં રાખીને દિલ્હીમાં 'નોટિસ ટુ એરમેન' (નોટમ) જારી કરવામાં આવ્યું હોવાથી શ્રીનગર આવતી-જતી ત્રણ ફ્લાઈટ્સ રદ કરવામાં આવી છે. આ 'નોટમ' છેલ્લા પાંચ દિવસથી અમલમાં છે અને દિલ્હીમાં ગણતંત્ર દિવસની ઉજવણી પૂર્ણ થાય ત્યાં સુધી ચાલુ રહેશે. આમ, આગામી બે દિવસ કાશ્મીરના હવામાન માટે અત્યંત નાજુક માનવામાં આવી રહ્યા છે.