નવી દિલ્હી : સરકારી નોકરી અને ખાસ કરીને બેંકિંગ ક્ષેત્રમાં કરિયર બનાવવા માંગતા યુવાનો માટે એક આશ્ચર્યજનક અને પ્રેરણાદાયી કિસ્સો સામે આવ્યો છે. સ્ટેટ બેંક ઓફ ઈન્ડિયા (SBI) માં પ્રોબેશનરી ઓફિસર (PO) તરીકે કાર્યરત એક મહિલાએ સોશિયલ મીડિયા પર પોતાની માસિક કમાણી જાહેર કરી છે, જે જોઈને નેટીઝન્સ દંગ રહી ગયા છે. આ મહિલા અધિકારીએ જણાવ્યું છે કે અઢી વર્ષની નોકરી બાદ તેનો દર મહિનાનો ઈન-હેન્ડ પગાર આશરે 95,000 રૂપિયા છે.
આ પોસ્ટ વાયરલ થતા જ ઈન્ટરનેટ પર ચર્ચા શરૂ થઈ ગઈ છે કે શું ખરેખર બેંકિંગમાં આટલો મોટો પગાર મળે છે? મહિલાએ સ્પષ્ટતા કરતા જણાવ્યું કે, તેનો બેઝિક પગાર 2022 માં નોકરી શરૂ કર્યા પછી પાંચ ઇન્ક્રીમેન્ટને કારણે આ સ્તરે પહોંચ્યો છે. જેમાં વાર્ષિક વધારા ઉપરાંત બેંકિંગ ક્ષેત્રની પ્રતિષ્ઠિત JAIIB અને CAIIB પરીક્ષાઓ પાસ કરવા બદલ મળેલા વધારાના લાભોનો પણ સમાવેશ થાય છે. આટલું જ નહીં, તેને ₹18,500 ભાડું અને ₹11,000 અન્ય ભથ્થાં પણ મળે છે, એટલે કે કુલ પેકેજ મહિનાના 1.20 લાખને પાર કરી જાય છે.
જોકે, આ આકર્ષક આંકડાઓની સાથે લોકોએ 'વર્ક લાઈફ બેલેન્સ' પર પણ સવાલો ઉઠાવ્યા છે. ઈન્સ્ટાગ્રામ પર 1.1 મિલિયનથી વધુ વ્યુઝ મેળવનારી આ પોસ્ટ પર યુઝર્સે રમુજી અને ગંભીર ટિપ્પણીઓ કરી છે. કોઈકે લખ્યું કે, "આટલા પગાર સામે બેંકમાં માનસિક તણાવ કેટલો હોય છે તે પણ જણાવો," તો કોઈકે મજાકમાં કહ્યું કે, "બેંકની નોકરી પછી મહિનાના 15 હજાર તો થેરાપીમાં ખર્ચાઈ જાય છે."
આમ છતાં, આ ખુલાસાએ અનેક બેંકિંગ આકાંક્ષીઓ માટે પ્રેરણાનું કામ કર્યું છે. મોંઘવારીના આ સમયમાં સરકારી બેંકમાં મળતા આવા શાનદાર પેકેજે ફરી એકવાર સાબિત કર્યું છે કે સખત મહેનત અને યોગ્ય પરીક્ષાઓ પાસ કરવાથી બેંકિંગ ક્ષેત્રમાં પણ આર્થિક સમૃદ્ધિ મેળવી શકાય છે.