નવી દિલ્હી : ભારતની નાગરિક ઉડ્ડયન ક્ષેત્રની ક્ષમતાઓને નવો વેગ આપતા એક મોટા સમાચાર સામે આવ્યા છે. કેન્દ્રીય નાગરિક ઉડ્ડયન મંત્રી રામ મોહન નાયડુની અધ્યક્ષતામાં આજે ભારતનું અદાણી ગ્રુપ અને બ્રાઝિલની દિગ્ગજ એરોસ્પેસ કંપની 'એમ્બ્રેર' (Embraer) વચ્ચે એક મહત્વપૂર્ણ કરાર કરવામાં આવ્યો છે. આ ભાગીદારીનો મુખ્ય હેતુ ભારતમાં પ્રાદેશિક પરિવહન વિમાન (Regional Transport Aircraft) માટે એક મજબૂત ઇકોસિસ્ટમ વિકસાવવાનો છે.
આ કરાર હેઠળ, બંને કંપનીઓ મળીને ભારતમાં વિમાનોના ઘટકોનું ઉત્પાદન અને જાળવણી, સમારકામ તેમજ ઓવરહોલ (MRO) સેવાઓ માટે સાથે મળીને કામ કરશે. મંત્રી રામ મોહન નાયડુએ આ જોડાણને 'મેક ઇન ઇન્ડિયા' અભિયાન માટે એક મોટું સીમાચિહ્ન ગણાવ્યું છે. તેમણે સોશિયલ મીડિયા પર પોસ્ટ કરીને જણાવ્યું હતું કે, આ સંગઠન પ્રાદેશિક હવાઈ જોડાણ માટે સંપૂર્ણપણે સ્વદેશી ઉકેલો લાવવામાં મહત્વની ભૂમિકા ભજવશે.
આ કરાર માત્ર વિમાનોના ઉત્પાદન પૂરતો સીમિત નથી, પરંતુ તે વૈશ્વિક ઉડ્ડયન સપ્લાય ચેઇનમાં ભારતનું સ્થાન વધુ મજબૂત કરશે. મંત્રીએ વધુમાં ઉમેર્યું હતું કે, આ પહેલ પ્રધાનમંત્રી નરેન્દ્ર મોદીના 'ઉડાન' (UDAN) મિશનના વિઝનને સાકાર કરવા માટે લેવામાં આવેલું એક સબળ ડગલું છે. જેનાથી નાના શહેરો વચ્ચે હવાઈ મુસાફરી વધુ સરળ અને સસ્તી બનશે.
આગામી સમયમાં આ ભાગીદારીને કારણે ભારતમાં જ વિમાનો તૈયાર થશે અને તેની જાળવણી પણ સ્થાનિક સ્તરે જ શક્ય બનશે, જેનાથી ઉડ્ડયન ક્ષેત્રમાં હજારો નવી રોજગારીની તકો પણ ઊભી થવાની અપેક્ષા છે.