બેંગલુરુ : ભારતની સિલિકોન વેલી ગણાતા બેંગલુરુમાં હવે કોફી પીતા-પીતા લેપટોપ પર ઓફિસની મીટિંગ કરવી મોંઘી પડી શકે છે. શહેરની એક જાણીતી ઈટરી (Eatery) એ લાંબા વેટિંગ ટાઈમથી બચવા અને ગ્રાહકોની અવરજવર જાળવી રાખવા માટે કોર્પોરેટ મીટિંગ્સ પર પ્રતિબંધ જેવો આકરો નિયમ લાદ્યો છે. રેસ્ટોરન્ટના નવા નિયમ મુજબ, જો કોઈ ગ્રાહક ટેબલ પર લાંબો સમય બેસીને બિઝનેસ મીટિંગ કરશે, તો તેણે દર કલાકના ₹1,000 વધારાનો ચાર્જ ચૂકવવો પડશે.
હકીકતમાં, બેંગલુરુના આઈટી હબમાં આવેલી આ રેસ્ટોરન્ટમાં જોવા મળ્યું હતું કે ઘણા કોર્પોરેટ કર્મચારીઓ એક કપ કોફી મંગાવીને કલાકો સુધી ટેબલ રોકી રાખતા હતા. લેપટોપ અને મોબાઈલ ચાર્જર સાથે આ લોકો રેસ્ટોરન્ટને પોતાની ઓફિસ બનાવી દેતા હતા, જેના કારણે ખરેખર જમવા આવતા ગ્રાહકોને કલાકો સુધી બહાર ઊભા રહેવું પડતું હતું. રેસ્ટોરન્ટના બિઝનેસ પર થતી આ માઠી અસરને રોકવા માટે સંચાલકોએ આ ‘કવર ચાર્જ’ વસૂલવાનું નક્કી કર્યું છે.
રેસ્ટોરન્ટના માલિકોનું કહેવું છે કે, "અમે ઈચ્છીએ છીએ કે લોકો અહીં આવીને ભોજનનો આનંદ માણે, નહીં કે ઓફિસની ફાઇલો અને ઝૂમ કોલ્સમાં વ્યસ્ત રહે. જ્યારે કોઈ વ્યક્તિ એક ટેબલ પર 3-4 કલાક બેસી રહે છે, ત્યારે અમે અન્ય 10 સંભવિત ગ્રાહકોને ગુમાવીએ છીએ." આ નિર્ણયથી સોશિયલ મીડિયા પર મિશ્ર પ્રતિસાદ મળી રહ્યો છે. કેટલાક લોકો તેને યોગ્ય ગણાવી રહ્યા છે, જ્યારે 'વર્ક ફ્રોમ એનીવેર' (Work from anywhere) ના ચાહકો આ નિર્ણયને કઠોર ગણાવી રહ્યા છે.
આ અગાઉ પણ બેંગલુરુની કેટલીક કેફે ચેઈન્સે લેપટોપના વપરાશ પર પ્રતિબંધ મૂક્યો હતો, પરંતુ કલાકના ધોરણે ₹1000 વસૂલવાનો આ કદાચ પહેલો કિસ્સો છે. હવે જોવાનું એ રહેશે કે આ નિયમ બાદ બેંગલુરુના ટેકીઝ પોતાની મીટિંગ્સ માટે કયું નવું ઠેકાણું શોધે છે!