કોલકાતા : હરિયાણાના કરનાલમાં મૌની રોય સાથે થયેલી છેડતીની ઘટનાની શાહી હજુ સુકાઈ નથી ત્યાં બંગાળી સિનેમાની જાણીતી અભિનેત્રી અને ભૂતપૂર્વ TMC સાંસદ મીમી ચક્રવર્તી સાથે જાહેર કાર્યક્રમમાં દુર્વ્યવહારની ચોંકાવનારી ઘટના સામે આવી છે. ઉત્તર ૨૪ પરગણાના બોનગાંવમાં એક લાઈવ પરફોર્મન્સ દરમિયાન મીમીને માત્ર પ્રેક્ષકોની હેરાનગતિનો જ નહીં, પરંતુ આયોજકોના અપમાનજનક વલણનો પણ સામનો કરવો પડ્યો હતો. અભિનેત્રીએ ખુલાસો કર્યો કે તેને પાયાવિહોણા આરોપો લગાવીને અધવચ્ચે જ સ્ટેજ છોડી દેવા માટે મજબૂર કરવામાં આવી હતી. આ ગંભીર મામલે મીમીએ મૌન રહેવાને બદલે જવાબદારી નક્કી કરવા માટે આયોજકો વિરુદ્ધ FIR દાખલ કરીને કાયદેસરની કાર્યવાહી હાથ ધરી છે.

સોશિયલ મીડિયા પર પોતાની વ્યથા ઠાલવતા મીમીએ લખ્યું કે, મહિલા કલાકારો પાસેથી હંમેશા 'સહન કરવાની અને મૌન રહેવાની' અપેક્ષા રાખવામાં આવે છે, પરંતુ હવે સમય આવી ગયો છે કે સીમાઓ નક્કી કરવામાં આવે. તેણે આક્ષેપ કર્યો કે અન્ય કલાકારનું સન્માન જાળવવા તે ૨૦ મિનિટ સુધી કારમાં રાહ જોતી રહી, તેમ છતાં તેની સાથે સ્ટેજ પર ગેરવર્તણૂક કરવામાં આવી. મીમીના ટેકામાં તેના હજારો ચાહકો ઉતરી આવ્યા છે, જેમણે લાઈવ શો દરમિયાન થયેલી આ અરાજકતાના સ્ક્રીનશોટ અને વીડિયો શેર કર્યા છે. અભિનેત્રીએ સ્પષ્ટ શબ્દોમાં જણાવ્યું કે તેની ગરિમા તેના પરફોર્મન્સ જેટલી જ મહત્વની છે અને આ લડાઈ તે અન્ય મહિલા કલાકારોના આત્મસન્માન માટે લડી રહી છે.

આ ઘટનાએ ફરી એકવાર લાઈવ ઈવેન્ટ્સમાં મહિલા કલાકારોની સુરક્ષા અને આયોજકોની વ્યવસ્થા સામે મોટા પ્રશ્નાર્થ ચિહ્નો ઉભા કર્યા છે. મૌની રોયના કિસ્સામાં પણ ફોટો પડાવવાના બહાને થયેલી છેડતી અને અભદ્ર ટિપ્પણીઓએ મનોરંજન જગતને હચમચાવી દીધું હતું. કલાકારોના મતે, ભીડનું અનિયંત્રિત વર્તન અને આયોજકોનો નફ્ફટ અભિગમ પ્રોફેશનલ કલાકારો માટે નરક સમાન પરિસ્થિતિ ઉભી કરે છે. મીમી ચક્રવર્તીની આ હિંમતભરી કાર્યવાહી બાદ હવે આયોજકો અને સુરક્ષા એજન્સીઓ પર દબાણ વધ્યું છે. જો જાહેર જીવનમાં સક્રિય અને રાજકીય કદ ધરાવતી મહિલાઓ પણ અસુરક્ષિત હોય, તો સામાન્ય મહિલા કલાકારોની સ્થિતિ કેટલી ગંભીર હશે તે વિચારીને જ ધ્રુજારી છૂટી જાય છે.