મુંબઈ:  વૈશ્વિક ચલણ બજારમાં  એક મોટો ઉલટફેર જોવા મળ્યો છે. સતત દબાણ હેઠળ રહેલા ભારતીય રૂપિયાએ 'બાઉન્સ બેક' કરતા અમેરિકી ડોલર સામે ૧૯ પૈસાની મજબૂત તેજી નોંધાવી છે. શુક્રવારે જે રૂપિયો ૯૨ ના ઐતિહાસિક નીચલા સ્તરે જઈને રોકાણકારોના શ્વાસ અધ્ધર કરી દીધા હતા, તેણે મંગળવારે ૯૧.૭૧ ના સ્તરે બંધ રહીને સાબિત કરી દીધું છે કે ભારતીય અર્થતંત્રમાં હજુ ઘણું દમ છે. આ વાપસી પાછળનું સૌથી મોટું કારણ ભારત અને યુરોપિયન યુનિયન (EU) વચ્ચે થયેલો ઐતિહાસિક મુક્ત વેપાર કરાર (FTA) માનવામાં આવી રહ્યો છે. આ કરારને "બધા સોદાઓની માતા" કહેવામાં આવી રહ્યો છે, કારણ કે તે ૨ અબજ લોકોના વિશાળ બજારના દ્વાર ખોલશે, જેણે અમેરિકી બજારમાં પણ ખળભળાટ મચાવ્યો છે.

ડોલર ઇન્ડેક્સમાં જોવા મળેલો ૦.૧૨ ટકાનો ઘટાડો રૂપિયા માટે 'સંજીવની' સાબિત થયો છે. છેલ્લા એક વર્ષમાં ડોલર ૧૦ ટકા જેટલો તૂટ્યો છે, જેના કારણે વૈશ્વિક સ્તરે ડોલરની સર્વોપરિતા સામે સવાલો ઉઠી રહ્યા છે. ખાસ કરીને જ્યારે ડોનાલ્ડ ટ્રમ્પ કેનેડા અને દક્ષિણ કોરિયા જેવા દેશો પર ભારે ટેરિફ લાદવાની ધમકી આપી રહ્યા છે, ત્યારે ભારત અને યુરોપની આ નિકટતા અમેરિકા માટે મોટો રાજદ્વારી ઝટકો છે. નિષ્ણાતો માને છે કે હવે ટ્રમ્પ વહીવટીતંત્ર પણ ભારત સાથે વેપાર વાટાઘાટો ઝડપી બનાવવા મજબૂર થશે, કારણ કે ભારત જેવા મોટા બજારને ગુમાવવું અમેરિકાને પરવડે તેમ નથી. વિદેશી ચલણ બજારમાં ટ્રેડરોની લેવાલીએ રૂપિયાને વધુ બળ પૂરું પાડ્યું છે.

જોકે, રૂપિયાની આ વિજયકૂચમાં ક્રૂડ ઓઇલના વધતા ભાવ અને વિદેશી રોકાણકારો (FII) દ્વારા કરવામાં આવતી વેચવાલી હજુ પણ અવરોધરૂપ બની રહી છે. બ્રેન્ટ ક્રૂડ ૬૫ ડોલરની પાર પહોંચતા ભારતની આયાત બિલ વધવાની શક્યતા છે, જે રૂપિયા પર દબાણ લાવી શકે છે. તેમ છતાં, શેરબજારમાં જોવા મળેલી તેજી અને ફોરેક્સ રિઝર્વમાં થયેલા વધારાને કારણે બજારનું સેન્ટિમેન્ટ હકારાત્મક બન્યું છે. આગામી દિવસોમાં રૂપિયો ૯૧.૩૦ થી ૯૨ ની વચ્ચે અથડાય તેવી શક્યતા છે. હવે જોવાનું એ રહેશે કે માર્ચમાં કેનેડા સાથે શરૂ થનારી વેપાર વાટાઘાટો અને બજેટની અસરો રૂપિયાને કઈ નવી ઊંચાઈ પર લઈ જાય છે.