વોશિંગ્ટન: બીજા વિશ્વયુદ્ધના દાયકાઓ પછી ફરી એકવાર માનવજાત પર મહાવિનાશનું સંકટ મંડરાઈ રહ્યું છે. પ્રખ્યાત અમેરિકન રક્ષણ નિષ્ણાત ડૉ. રોબર્ટ ફાર્લીએ એક ચોંકાવનારો દાવો કર્યો છે કે વર્ષ 2026માં ‘ત્રીજું વિશ્વયુદ્ધ’ ફાટી નીકળવાની પ્રબળ શક્યતા છે. તેમના મતે, વૈશ્વિક વ્યવસ્થા ઝડપથી વિખેરાઈ રહી છે અને અમેરિકા હવે વિશ્વના સંઘર્ષોને રોકવામાં પહેલા જેવો રસ દાખવી રહ્યું નથી, જેના કારણે શાંતિ જોખમાઈ છે.
ડૉ. ફાર્લીએ પાંચ એવા સ્થળોની યાદી આપી છે જે આ ભયાનક યુદ્ધનું કેન્દ્ર બની શકે છે. જેમાં સૌથી ચોંકાવનારું નામ ગ્રીનલેન્ડનું છે, જ્યાં અમેરિકા અને યુરોપિયન દેશો વચ્ચે સંસાધનો અને કબજાને લઈને તણાવ વધી રહ્યો છે. બીજી તરફ, રશિયા-યુક્રેન યુદ્ધ પાંચમા વર્ષમાં પ્રવેશતા અને યુરોપિયન દેશોના સીધા હસ્તક્ષેપની શક્યતાએ આખી દુનિયાને પરમાણુ યુદ્ધની ધમકી હેઠળ લાવી દીધી છે.
 એશિયામાં ચીનની તાઇવાન પર હુમલો કરવાની ફિરાક અને ઈરાનની અસ્થિરતા વૈશ્વિક સ્તરે આગ ચાંપી શકે છે. ખાસ કરીને ભારત અને પાકિસ્તાન વચ્ચેના સંબંધોને ડૉ. ફાર્લીએ અત્યંત ‘ખતરનાક’ ગણાવ્યા છે. 2025માં થયેલા ‘ઓપરેશન સિંદૂર’ જેવી ઘટનાઓ અને કાશ્મીર મુદ્દે વધતો તણાવ કોઈપણ સમયે બે પરમાણુ સશસ્ત્ર દેશોને સામસામે લાવી શકે છે. જો ભારત-પાક વચ્ચે યુદ્ધ થાય, તો તેમાં ચીન અને અમેરિકા પણ ખેંચાઈ આવશે, જે અંતે વિશ્વયુદ્ધમાં પરિણમશે.
આ લેખમાં ચેતવણી આપવામાં આવી છે કે હવે યુદ્ધ માત્ર સરહદો પૂરતું મર્યાદિત નથી રહ્યું, પરંતુ તે સમગ્ર વિશ્વની અર્થવ્યવસ્થા અને અસ્તિત્વને જોખમમાં મૂકી રહ્યું છે. શું વિશ્વના નેતાઓ સમયસર ચેતીને આ મહાવિનાશને રોકી શકશે? તે હવે મોટો પ્રશ્ન છે.