બેઇજિંગ, તા. 28 : જાપાનના ટોક્યો સ્થિત યુનો પ્રાણી સંગ્રહાલયના સૌથી લોકપ્રિય મહેમાન અને લાખો લોકોના લાડકવાયા જોડિયા પાંડા, ઝિયાઓ ઝિયાઓ (Xiao Xiao) અને લેઈ લેઈ (Lei Lei) બુધવારે સવારે ચીન પરત પહોંચ્યા છે. ૨૦૨૧માં જાપાનમાં જન્મેલા આ પાંડાઓની વિદાય વખતે જાપાનના લોકોની આંખો ભીની થઈ ગઈ હતી, કારણ કે તેમની વિદાય સાથે જ જાપાન હવે ૧૯૭૨ પછી પહેલીવાર 'પાંડા મુક્ત' દેશ બની ગયો છે.
ભાવુક વિદાય અને સુરક્ષિત પ્રવાસ
બુધવારે સવારે ૧ વાગ્યે ચેંગડુના તિયાનફુ ઇન્ટરનેશનલ એરપોર્ટ પર ઉતરાણ કર્યા બાદ, બંને પાંડાઓને ચીનના સિચુઆન પ્રાંતમાં આવેલા બિફેંગ્ઝિયા પાંડા બેઝ પર લઈ જવામાં આવ્યા છે. હાલમાં તેમને ક્વોરેન્ટાઇનમાં રાખવામાં આવ્યા છે. WeChat પર શેર કરાયેલી તસવીરોમાં સફેદ રક્ષણાત્મક સૂટ પહેરેલા કામદારો આ વીઆઈપી (VIP) મહેમાનોની સંભાળ લેતા જોવા મળ્યા હતા.
તણાવપૂર્ણ સંબંધો અને પાંડા રાજનીતિ
ચીન દાયકાઓથી અન્ય દેશો સાથે સંબંધો સુધારવા માટે પાંડાને 'સદ્ભાવના દૂત' તરીકે મોકલે છે. જાપાન અને ચીન વચ્ચે અત્યારે તાઇવાન મુદ્દે ભારે રાજકીય તણાવ ચાલી રહ્યો છે, ત્યારે આ પાંડાઓની વિદાય લાંબા સમયથી આયોજિત હોવા છતાં તેને સાંકેતિક માનવામાં આવી રહી છે. જોકે, ઇતિહાસ સાક્ષી છે કે જ્યારે પણ સંબંધોમાં સુધારો થાય છે, ત્યારે ચીન ફરીથી નવા પાંડા ભેટમાં આપે છે.
દક્ષિણ કોરિયામાં હવે નવી આશા
જાપાનની વિદાય બાદ હવે પાંડા ડિપ્લોમસીનું આગામી કેન્દ્ર દક્ષિણ કોરિયા બની શકે છે. જાન્યુઆરીમાં ચીનના રાષ્ટ્રપતિ શી જિનપિંગ અને દક્ષિણ કોરિયાના રાષ્ટ્રપતિ વચ્ચે થયેલી મંત્રણા બાદ નવા પાંડાઓ માટેની વાટાઘાટો શરૂ થવાના સંકેત મળ્યા છે. હાલમાં અમેરિકા અને ઓસ્ટ્રેલિયામાં પણ ચીને નવા પાંડા મોકલવાના વચનો આપ્યા છે, જે દર્શાવે છે કે આ નિર્દોષ પ્રાણીઓ આંતરરાષ્ટ્રીય રાજકારણના મોટા સોદાઓમાં મહત્વની ભૂમિકા ભજવે છે.
ઝિયાઓ અને લેઈ લેઈ ભલે ચીન ગયા, પણ જાપાનના લોકોના હૃદયમાં તેમની યાદો કાયમ માટે અંકિત રહેશે.