પેરિસ, તા. 28 : ફ્રાન્સના પ્રખ્યાત આલ્પ્સ પર્વતોમાં આવેલા લક્ઝરી સ્કી રિસોર્ટ કોર્ચેવેલમાં મંગળવારે મોડી રાત્રે એક ભયાનક દુર્ઘટના ઘટી હતી. અહીંની અત્યંત મોંઘી ગણાતી ફાઈવ સ્ટાર હોટેલ 'ડેસ ગ્રાન્ડેસ આલ્પ્સ'ના ઉપરના ભાગમાં (એટિક) અચાનક આગ ફાટી નીકળી હતી. બરફથી છવાયેલા પહાડો વચ્ચે લાગેલી આ આગના ધુમાડાના ગોટેગોટા દૂર-દૂર સુધી જોવા મળ્યા હતા, જેના કારણે પ્રવાસીઓમાં ભારે ગભરાટ ફેલાયો હતો.
મધરાતે રેસ્ક્યુ ઓપરેશન
સ્થાનિક અધિકારીઓના જણાવ્યા મુજબ, આગ લાગતાની સાથે જ હોટેલમાંથી ૯૦ જેટલા લોકોને તાત્કાલિક સુરક્ષિત બહાર કાઢવામાં આવ્યા હતા. જોકે, આગની તીવ્રતા જોતા બુધવારે સવારે બાજુમાં આવેલી 'લે લાના' હોટેલને પણ ખાલી કરાવવાની ફરજ પડી હતી, જેમાં લગભગ ૨૦૦ મહેમાનો રોકાયા હતા. કુલ મળીને ૩૦૦ જેટલા પ્રવાસીઓને અન્ય હોટેલોમાં ખસેડવામાં આવ્યા છે. સદનસીબે, આ દુર્ઘટનામાં કોઈ પ્રવાસીને ઈજા થઈ નથી.
હાડ થીજવતી ઠંડીમાં અગ્નિશામકોની લડત
સેવોઈના પ્રીફેક્ટ વેનીના નિકોલીએ જણાવ્યું હતું કે, ૧૩૧ અગ્નિશામકો અત્યંત મુશ્કેલ અને પ્રતિકૂળ સંજોગોમાં આગ પર કાબૂ મેળવવાનો પ્રયાસ કરી રહ્યા છે. શૂન્યથી નીચેના તાપમાન અને ધુમાડાના કારણે કામગીરીમાં અવરોધ આવી રહ્યો છે. આ લડત દરમિયાન ધુમાડાની અસરને કારણે ચાર અગ્નિશામકોની તબિયત લથડી હતી, જેમને સારવાર માટે ખસેડાયા છે.
તંત્ર દ્વારા તપાસના આદેશ
અગ્નિશામકોએ હાલમાં આગને આસપાસની અન્ય ઇમારતોમાં ફેલાતી અટકાવી દીધી છે. પોલીસ (ગેન્ડરમેરી) દ્વારા આ આગ પાછળનું ચોક્કસ કારણ જાણવા માટે તપાસ શરૂ કરવામાં આવી છે. ઉલ્લેખનીય છે કે, થોડા સમય પહેલા જ સ્વિસ રિસોર્ટમાં લાગેલી આગમાં અનેક લોકોના મોત થયા હતા, જેના કારણે ફ્રેન્ચ સત્તાવાળાઓએ આ ઘટનાને અત્યંત ગંભીરતાથી લીધી છે.