કોલકાતા : પશ્ચિમ બંગાળમાં આગામી ચૂંટણીઓ પૂર્વે વહીવટી મોરચે ગરમાવો આવી ગયો છે. રાજ્યમાં ચાલી રહેલી 'મતદાર યાદી ખાસ સઘન સુધારણા' (SIR) ની પ્રક્રિયા વચ્ચે રાજ્ય સરકારે ત્રણ મહત્વના નિરીક્ષકોની બદલી કરી દેતા ભારતીય ચૂંટણી પંચે (EC) ભારે નારાજગી વ્યક્ત કરી છે. પંચે આદેશ જારી કર્યો છે કે રાજ્ય સરકાર આ ટ્રાન્સફર ઓર્ડર તાત્કાલિક અસરથી રદ કરે, કારણ કે આ બદલીઓ પંચની પૂર્વ મંજૂરી વિના કરવામાં આવી છે જે નિયમોનો સીધો ભંગ છે.
ચૂંટણી પંચના આદેશનું ઉલ્લંઘન
ચૂંટણી પંચે સ્પષ્ટ કર્યું છે કે જ્યારે મતદાર યાદી સુધારણા જેવી મહત્વની પ્રક્રિયા ચાલતી હોય, ત્યારે તેમાં સામેલ કોઈપણ અધિકારીને પંચની સહમતી વગર હટાવી શકાય નહીં. તેમ છતાં, બંગાળ સરકારે ઉત્તર અને દક્ષિણ દિનાજપુરના નિરીક્ષક અશ્વિની કુમાર યાદવ, ઉત્તર ૨૪ પરગણાના નિરીક્ષક રણધીર કુમાર અને બર્ધમાન-બીરભૂમના નિરીક્ષક સ્મિતા પાંડેની બદલીના આદેશો જારી કર્યા હતા. પંચે આ પગલાને ગેરબંધારણીય ગણાવ્યું છે.
'ડીમ્ડ ડેપ્યુટેશન' પર છે આ અધિકારીઓ
ચૂંટણી પંચે રાજ્ય સરકારને મોકલેલા પત્રમાં ભારપૂર્વક જણાવ્યું છે કે, જે ક્ષણે કોઈ અધિકારીને ચૂંટણી લક્ષી કામગીરી સોંપાય છે, તે ક્ષણથી તે અધિકારી ચૂંટણી પંચ હેઠળ 'ડીમ્ડ ડેપ્યુટેશન' પર ગણાય છે. એટલે કે, તેમના પર વહીવટી અંકુશ માત્ર પંચનો જ રહે છે. પંચની પરવાનગી વગર આવા અધિકારીઓની બદલી કરવી એ પ્રક્રિયામાં અવરોધ ઊભો કરવા સમાન છે.
હવે જોવાનું એ રહેશે કે ચૂંટણી પંચના આ આકરા તેવર સામે પશ્ચિમ બંગાળ સરકાર શું પ્રતિક્રિયા આપે છે અને આ વિવાદ આગામી દિવસોમાં કેવું સ્વરૂપ ધારણ કરે છે.