વોશિંગ્ટન : અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સામે આક્રમક વલણ અપનાવતા વિશ્વભરમાં ખળભળાટ મચી ગયો છે. ટ્રમ્પે ઈરાનને સ્પષ્ટ શબ્દોમાં ચેતવણી આપી છે કે જો તે પરમાણુ શસ્ત્રોના ત્યાગ માટે વાટાઘાટોની ટેબલ પર નહીં આવે, તો આગામી હુમલો એટલો "ખરાબ" હશે કે ઈરાને તેની કલ્પના પણ નહીં કરી હોય. ટ્રમ્પે તેમના 'ટ્રુથ સોશિયલ' પ્લેટફોર્મ પર લખ્યું છે કે અમેરિકી નૌકાદળનું એરક્રાફ્ટ કેરિયર 'યુએસએસ અબ્રાહમ લિંકન' તેના સંપૂર્ણ કાફલા સાથે મિશન માટે રવાના થઈ ચૂક્યું છે.
સમય પૂરો થઈ રહ્યો છે: ટ્રમ્પનું અલ્ટીમેટમ
ટ્રમ્પે તેહરાનને વાજબી સોદો કરવા માટે આહ્વાન કરતા કહ્યું કે, "સમય ખરેખર ઓછો છે અને તે ખૂબ જ કિંમતી છે. આશા છે કે ઈરાન ઝડપથી 'નો ન્યુક્લિયર વેપન્સ'ના કરાર પર વાટાઘાટો કરશે." તેમણે અગાઉના યુએસ હુમલા 'ઓપરેશન મિડનાઈટ હેમર'નો ઉલ્લેખ કરીને યાદ અપાવ્યું કે અમેરિકા કોઈપણ ક્ષણે હિંસક અને ઝડપી કાર્યવાહી કરવા સક્ષમ છે. જોકે, ઈરાનના વિદેશ પ્રધાન અબ્બાસ અરાઘચીએ આ ધમકીઓને નકારી કાઢતા કહ્યું છે કે લશ્કરી દબાણ હેઠળ કોઈ રાજદ્વારી વાટાઘાટો શક્ય નથી.
ઈરાનમાં લોહિયાળ અશાંતિ અને માનવાધિકારનું જોખમ
એક તરફ સરહદો પર યુદ્ધના વાદળો છવાયા છે, તો બીજી તરફ ઈરાન અંદરખાને પણ સળગી રહ્યું છે. સરકાર વિરોધી પ્રદર્શનોમાં અત્યાર સુધીમાં 6,200 થી વધુ લોકોના મોતની પુષ્ટિ થઈ છે અને 42,000 થી વધુ લોકોની ધરપકડ કરવામાં આવી હોવાના અહેવાલ છે. આ પરિસ્થિતિને કારણે મધ્ય પૂર્વ (Middle East) માં ભારે અસ્થિરતા સર્જાઈ છે. દરમિયાન, ઈરાની અધિકારીઓ કતાર અને ઈજિપ્ત જેવા દેશો મારફતે અમેરિકા સાથે 'બેક-ચેનલ' રાજદ્વારી વાતચીત કરવાનો પ્રયાસ પણ કરી રહ્યા હોવાનું જાણવા મળ્યું છે.
અમેરિકાના આ કડક વલણને પગલે હવે આખું વિશ્વ શ્વાસ અધ્ધર કરીને જોઈ રહ્યું છે કે ઈરાન નમી જશે કે પછી ખાડીના દેશોમાં ફરી એકવાર યુદ્ધનું રણશિંગુ ફૂંકાશે.