નવી દિલ્હી:  ભારત હવે માત્ર વિમાનો ખરીદનારો દેશ નહીં, પણ વિમાનો વેચનારો દેશ બનવા તરફ કૂચ કરી રહ્યો છે. 'વિંગ્સ ઇન્ડિયા ૨૦૨૬' કાર્યક્રમમાં થયેલા ઐતિહાસિક કરારોએ સાબિત કરી દીધું છે કે ભારત હવે કોમર્શિયલ જેટ ઉત્પાદનનું વૈશ્વિક હબ બનવા જઈ રહ્યું છે. રશિયાની કંપની અને હિન્દુસ્તાન એરોનોટિક્સ લિમિટેડ  વચ્ચે થયેલા 'સુપરજેટ' ઉત્પાદનના કરારે રશિયન ટેકનોલોજી અને ભારતીય કૌશલ્યનો અદભૂત સંગમ રચ્યો છે. આ પ્રોજેક્ટ્સ સફળ થતાં જ ભારત વિશ્વના ઉડ્ડયન નકશા પર અમેરિકાની બોઇંગ અને યુરોપની એરબસ જેવી દિગ્ગજ કંપનીઓની હરોળમાં આવી જશે.

બીજી તરફ, ઉદ્યોગપતિ ગૌતમ અદાણીના અદાણી ગ્રુપ અને બ્રાઝિલની વિમાન ઉત્પાદક કંપની એમ્બ્રેર વચ્ચે થયેલા કરારે આખા વિશ્વનું ધ્યાન ખેંચ્યું છે. ૨૭ જાન્યુઆરી, ૨૦૨૬ના રોજ થયેલા આ MoU હેઠળ ભારતમાં ૧૫૦ બેઠકો ધરાવતા પ્રાદેશિક પેસેન્જર જેટ્સની પ્રથમ એસેમ્બલી લાઇન સ્થાપિત કરવામાં આવશે. આ પ્લાન્ટ માટે ગુજરાત અથવા ઉત્તર પ્રદેશનું નામ રેસમાં સૌથી આગળ છે. આગામી પાંચ વર્ષમાં ભારતનું પ્રથમ સ્વદેશી કોમર્શિયલ જેટ તૈયાર થઈ જશે, જે ૨૦૪૫ સુધીમાં ૫૦૦થી વધુ વિમાનોની માંગ પૂરી કરશે. આ પ્રોજેક્ટથી ૫,૦૦૦થી વધુ હાઈ-ટેક નોકરીઓનું સર્જન થશે અને અર્થતંત્રમાં અબજો ડોલરનો નવો પ્રવાહ આવશે.

ભારત સરકારની પ્રોડક્શન-લિંક્ડ ઇન્સેન્ટિવ  યોજના આ આખી રમતને બદલી નાખનારી સાબિત થઈ રહી છે. સરકાર સ્થાનિક ઉત્પાદન પર ૪ થી ૧૮ ટકા સુધીનું માતબર પ્રોત્સાહન આપી રહી છે, જે વિદેશી કંપનીઓ માટે ભારતને આકર્ષક મેન્યુફેક્ચરિંગ ડેસ્ટિનેશન બનાવે છે. આનાથી ચીનના 'કોમેક' જેવા સ્પર્ધકો સામે ભારત મજબૂત રીતે ઉભું રહેશે. સપ્લાય ચેઇન, પાયલોટ તાલીમ અને મેન્ટેનન્સ સુવિધાઓના વિકાસથી ભારત આવનારા દાયકામાં વિશ્વની નવી 'એરક્રાફ્ટ ફેક્ટરી' બની જશે, જે દેશના આત્મનિર્ભરતાના મિશનને નવી પાંખો આપશે.