લખનૌ :બહુજન સમાજ પાર્ટીના વડા માયાવતીએ યુજીસીના નવા નિયમો પર સુપ્રીમ કોર્ટે લગાવેલા સ્ટેને ટેકો આપ્યો છે. માયાવતીએ 'X' (અગાઉનું ટ્વિટર) પર પોસ્ટ કરતા લખ્યું કે, યુજીસી દ્વારા લાગુ કરવામાં આવેલા નવા નિયમોએ દેશભરની યુનિવર્સિટીઓમાં સામાજિક અસંતુલન અને તણાવની સ્થિતિ પેદા કરી હતી. વર્તમાન સંજોગોમાં સુપ્રીમ કોર્ટનો આ નિર્ણય અત્યંત આવકારદાયક અને સાચો છે.
 સુપ્રીમ કોર્ટમાં સુનાવણી દરમિયાન મુખ્ય ન્યાયાધીશ સૂર્યકાંત અને ન્યાયાધીશ જોયમલ્યા બાગચીની બેન્ચે ગંભીર ટિપ્પણી કરી હતી. કોર્ટે જણાવ્યું કે, નવા નિયમોમાં રહેલી જોગવાઈઓ 'અસ્પષ્ટ' છે અને તેનો દુરુપયોગ થવાની પૂરેપૂરી શક્યતા છે. જો આ નિયમોમાં હસ્તક્ષેપ કરવામાં ન આવ્યો હોત, તો તેના પરિણામો સમાજને વિભાજિત કરી શકે તેવા ખતરનાક હોત.
માયાવતીએ સરકારની ટીકા કરતા જણાવ્યું કે, જો યુજીસીએ આ નિયમો લાગુ કરતા પહેલા તમામ હિતધારકોને વિશ્વાસમાં લીધા હોત અને તપાસ સમિતિમાં ઉચ્ચ જાતિના સમુદાયને પણ યોગ્ય સ્થાન આપ્યું હોત, તો આ વિવાદ વકર્યો ન હોત. નોંધનીય છે કે, નવા નિયમોની કલમ 3(C) માં જાતિ આધારિત ભેદભાવની વ્યાખ્યામાં માત્ર SC, ST અને OBC નો જ સમાવેશ કરાયો હતો, જેના કારણે સામાન્ય શ્રેણીના વિદ્યાર્થીઓમાં ભારે રોષ જોવા મળ્યો હતો.
સુપ્રીમ કોર્ટે આદેશ આપ્યો છે કે જ્યાં સુધી નવો ચુકાદો ન આવે ત્યાં સુધી વર્ષ 2012 ના જૂના નિયમો જ અમલમાં રહેશે. આ કેસની આગામી સુનાવણી 19 માર્ચ, 2026 ના રોજ નક્કી કરવામાં આવી છે. માયાવતીની આ પ્રતિક્રિયાથી સ્પષ્ટ થાય છે કે આગામી સમયમાં આ મુદ્દો રાજકીય રીતે પણ વધુ ગરમાશે.