અયોધ્યા:ઉત્તર પ્રદેશના અયોધ્યા જિલ્લાના ચર્ચિત ભદરસા ગેંગરેપ કેસમાં પોક્સો (POCSO) કોર્ટે એક મોટો ચુકાદો આપ્યો છે. કોર્ટે સમાજવાદી પાર્ટીના નેતા મોઈદ ખાનને તમામ આરોપોમાંથી નિર્દોષ જાહેર કરી બાઈજ્જત બરી કર્યા છે. બીજી તરફ, આ જ કેસમાં સહ-આરોપી અને મોઈદ ખાનના નોકર રાજુ ખાનને ૨૦ વર્ષની સખત કેદની સજા ફટકારવામાં આવી છે.
આ કેસમાં વિજ્ઞાન એટલે કે DNA રિપોર્ટ સૌથી મહત્વનો સાબિત થયો હતો. તપાસ દરમિયાન માલૂમ પડ્યું હતું કે પીડિતાના ગર્ભના નમૂના મોઈદ ખાનના DNA સાથે મેચ થયા નહોતા, પરંતુ રાજુ ખાન સાથે મેચ થયા હતા. આ પુરાવાના આધારે ન્યાયાધીશ નિરુપમા વિક્રમે મોઈદ ખાનને નિર્દોષ ઠેરવ્યો હતો. જોકે, નિર્દોષ જાહેર થયા છતાં મોઈદ ખાન હજુ જેલમાંથી બહાર આવી શકશે નહીં, કારણ કે તેની સામે ગેંગસ્ટર એક્ટ હેઠળ અન્ય કેસ ચાલુ છે.
મોઈદ ખાન નિર્દોષ છૂટતા જ સમાજવાદી પાર્ટીના અધ્યક્ષ અખિલેશ યાદવે યોગી સરકાર પર નિશાન સાધ્યું છે. અખિલેશ યાદવે સોશિયલ મીડિયા પર પોતાની પ્રતિક્રિયા આપતા કહ્યું કે:
: આ કેસ સામે આવતા જ સરકારે તપાસ પહેલા જ મોઈદ ખાનની બેકરી અને મિલકતો પર બુલડોઝર ફેરવી દીધું હતું. અખિલેશે તેને 'વિનાશકારી વિચારસરણી' ગણાવી હતી.
અખિલેશે ઉમેર્યું કે, "સરકારે એક નિર્દોષ વ્યક્તિને બદનામ કર્યો અને તેની સંપત્તિ તોડી પાડી. આ પાપનો હિસાબ ઉપરવાળાની અદાલતમાં ચોક્કસ થશે."
 તેમણે કહ્યું કે સત્ય હંમેશા પરેશાન થઈ શકે છે, પણ પરાજિત નહીં.
   અત્રે ઉલ્લેખનીય છે કે જુલાઈ ૨૦૨૪માં એક ૧૨ વર્ષની સગીરા સાથે દુષ્કર્મની આ ઘટના સામે આવી હતી. આ મામલામાં રાજકીય ગરમાવો એટલે વધ્યો હતો કારણ કે મુખ્યમંત્રી યોગી આદિત્યનાથે પોતે વિધાનસભામાં આ કેસનો ઉલ્લેખ કરી સપા પર કટાક્ષ કર્યા હતા. હવે મોઈદ ખાન નિર્દોષ છૂટતા વિપક્ષને સરકારને ઘેરવા માટે મોટો મુદ્દો મળી ગયો છે.