મુંબઈ :  નેશનલ સ્ટોક એક્સચેન્જ (NSE) ના IPO ની રાહ જોઈ રહેલા કરોડો રોકાણકારો માટે આખરે વર્ષના સૌથી મોટા સમાચાર સામે આવ્યા છે. માર્કેટ રેગ્યુલેટર SEBI એ NSE ના પબ્લિક ઈશ્યૂ માટે 'નો ઓબ્જેક્શન સર્ટિફિકેટ' (NOC) આપી દીધું છે. આ મંજૂરી સાથે જ NSE ના લિસ્ટિંગ માટેનો સૌથી મોટો અવરોધ દૂર થઈ ગયો છે અને હવે એક્સચેન્જ ટૂંક સમયમાં તેનો ડ્રાફ્ટ પેપર્સ (DRHP) ફાઈલ કરવાની તૈયારીમાં છે.
નોંધનીય છે કે NSE લાંબા સમયથી કો-લોકેશન વિવાદમાં ફસાયેલું હતું, પરંતુ સેબી સાથે આશરે ₹૧,૪૦૦ કરોડની પતાવટ રકમ ચૂકવવાની સમજૂતી બાદ હવે આ માર્ગ સ્પષ્ટ થયો છે.
 SEBI તરફથી NOC મળ્યા બાદ હવે આગળની પ્રક્રિયા કેવી રહેશે તેના પર એક નજર:
 NSE ના CEO આશિષ ચૌહાણના જણાવ્યા મુજબ, હવે DRHP અને ઓફર ફોર સેલ (OFS) ના દસ્તાવેજો તૈયાર કરવામાં ૩ થી ૪ મહિના લાગશે.
 તમામ મંજૂરીઓ અને દસ્તાવેજી પ્રક્રિયા પૂર્ણ થયા બાદ અંદાજે ૮ થી ૯ મહિનામાં NSE નો IPO બજારમાં આવી શકે છે.
વેલ્યુએશન: બજારના વિશ્લેષકોના મતે, લિસ્ટિંગ સમયે NSE નું માર્કેટ કેપિટલાઇઝેશન આશરે ₹૫ લાખ કરોડ રહેવાની ધારણા છે, જે તેને ભારતની સૌથી મૂલ્યવાન લિસ્ટેડ કંપનીઓમાંની એક બનાવશે.
 આ IPO સંપૂર્ણપણે 'ઓફર ફોર સેલ' (OFS) હશે, એટલે કે વર્તમાન શેરધારકો તેમના શેર વેચશે અને કંપનીને નવી મૂડી મળશે નહીં. જો કે, NSE નું લિસ્ટિંગ થવાથી બજારમાં પારદર્શિતા વધશે અને રોકાણકારોને વિશ્વના સૌથી મોટા ડેરિવેટિવ્ઝ એક્સચેન્જમાં હિસ્સેદારી ખરીદવાની સીધી તક મળશે.
લાંબા કાનૂની સંઘર્ષ બાદ મળેલી આ મંજૂરીથી બજારના નિષ્ણાતોમાં ભારે ઉત્સાહ છે. કાનૂની નિષ્ણાતો માને છે કે NSE એ સમજૂતી કરીને શેરધારકોના હિતમાં મોટું પગલું ભર્યું છે જેથી કરીને લિસ્ટિંગની પ્રક્રિયા ઝડપથી આગળ વધી શકે.