અમેરિકામાં ઘર ખરીદવા કરતાં ભાડે રહેવું વધુ ફાયદેમંદ
ન્યૂયોર્ક અને લોસ એન્જેલસ જેવા શહેરોમાં પણ લોનના હપ્તા કરતા મકાનનું ભાડું ઘણું ઓછું, લોકો હવે મકાન ખરીદવા કરતા સ્ટોક માર્કેટમાં પૈસા લગાડી રહ્યા છે
ન્યૂયોર્ક તા.૩૧: યુએસમાં હાઉસિગ માર્કેટમાં બદલાઈ રહેલા ટ્રેન્ડને કારણે હવે મોટાભાગના શહેરોમાં લોન પર મકાન ખરીદવા કરતા ભાડાંના ઘરમાં રહેવું વધારે સસ્તું થઈ ગયું છે. એક સરવે અનુસાર પોતાનું મકાન ખરીદનારાને ઉંચા વ્યાજ અને ઘરની વધારે કિમતને કારણે દર મહિને એવરેજ ૫૫૦ ડોલર અથવા વર્ષના ૬૫૦૦ ડોલરનું નુક્સાન ભોગવવું પડે છે, તેની સામે જો કોઈ ભાડાનાં મકાનમાં રહે તો તેને આટલી બચત થાય છે.
નવાઈની વાત એ છે કે લોસ એન્જેલસ, સેન ફ્રાન્સિસ્કો અને ન્યૂયોર્ક જેવા મોટા શહેરોમાં તો ભાડાનાં મકાનમાં રહીને લોકો હાઉસિગ લોનના હપ્તા ભરવાને બદલે મહિને ૧૫૦૦ ડોલર જેટલી બચત કરી શકે છે. અમેરિકામાં ભાડાંના મકાનમાં રહેતા લોકો મહિનાનું એવરેજ ૧૫૦૦ ડોલર જેટલું ભાડું ચૂકવે છે જ્યારે હોમ લોનનો એવરેજ હપ્તો ૨૦૦૦ ડોલરની આસપાસ થાય છે.
તેમાંય સધર્ન કેલિફોર્નિયામાં મકાનો મોંઘા હોવાથી લોનના હપ્તાની રકમ પણ વધી જાય છે. ઓનલાઈન લેન્ડિંગ માર્કેટપ્લેસ લેન્ડિંગટ્રી દ્વારા કરવામાં આવેલા આ સરવેમાં એવું પણ જણાવાયું છે કે હાઉસિગ માર્કેટમાં વધતી અનઅફોર્ડેબિલિટીને કારણે યંગ અમેરિકન્સ માટે પોતાનું ઘર ખરીદવું હાલ લગભગ અશક્ય થઈ ગયું છે.
મકાનોની કિમત ઘટી રહી હોવા છતાંય તેના પેન્ડિંગ સોદા રદ થવાનું પ્રમાણ વધી રહ્યું છે અને બોન્ડ યિલ્ડમાં વધારો થઈ રહ્યો હોવાથી હાઉસિગ લોનનો વ્યાજ દર પણ વધી રહ્યો છે. પોતાનું મકાન ખરીદવા ઈચ્છતા લોકોને લોનના હપ્તા પેટે મોટી રકમ ના ચૂકવવી પડે તે માટે સરકાર હાઉસિગ લોનનો સમયગાળો એટલે કે ટેન્યોર વધારીને ૩૦ વર્ષથી વધારીને ૫૦ વર્ષ જેટલો લાંબો કરી દેવાનું પણ વિચારી રહી છે, પરંતુ આટલી લાંબી લોન લેનારાને મુદ્દલ કરતા ત્રણથી ચાર ગણું વ્યાજ ચૂકવવું પડશે તેવી શક્યતા પણ નકારી શકાય તેમ નથી.
નોકરી-ધંધાના ઠોકણા ના હોવાથી મકાન ખરીદવાનું રિસ્ક લેવા કરતા ઘણા અમેરિકન્સ પોતાના પૈસા સ્ટોક માર્કેટ તેમજ અન્ય ફાઈનાન્શિયલ ટૂલ્સમાં લગાવી રહ્યા છે. સ્ટોક માર્કેટ પણ હાલ તેજીમાં હોવાથી મકાનને બદલે તેમાં પૈસા રોકનારા હાલ પૂરતા ખુશ છે. જોકે, ફાઈનાન્શિયલ એક્સપર્ટ્સનું માનવું છે કે ઘર ખરીદવાને બદલે સ્ટોક માર્કેટમાં પૈસા લગાવવાનો જુગાડ ક્યારેક ભારે પણ પડી શકે છે.
લાંબા ગાળાની વેલ્થ માટે પોતાનું કમસેકમ એક ઘર હોવું જરૂરી છે અને જો રિટાયર્મેન્ટ પહેલા તમે લોનની ચૂકવણી કરી દો તો પાછળની જિદગીમાં સારી એવી ફાઈનાન્શિયલ ફલેક્સિબિલિટી મળી રહે છે. ખાસ તો હેલ્થ કેરનો ખર્ચો વધી રહ્યો હોવાથી ઘડપણમાં ભાડાંના મકાનમાં રહેવું જોખમી બની શકે છે.
રેડફિનના એક રિપોર્ટ અનુસાર માત્ર ડિસેમ્બરમાં જ ૪૦ હજાર જેટલા સાઈન્ડ હોમ પરચેઝ અગ્રિમેન્ટ્સ કેન્સલ થયા હતા, આ જ સમયગાળા દરમિયાન ઘર ખરીદનારા કરતા વેચનારા ૪૭ ટકા વધારે હતા તેવું પણ આ રિપોર્ટમાં જણાવાયું છે. ડિસેમ્બરમાં જ્યાં સૌથી વધુ ડીલ્સ કેન્સલ થઈ હતી તેમાં એટલાન્ટા પહેલા નંબર પર આવે છે જ્યારે ત્યારબાદ જેક્સનવીલ, સેન એન્ટોનિઓ, ક્લેવલેન્ડ અને ટેમ્પા રહ્યા હતા. ડીલ કેન્સલ થવાનું સૌથી ઓછું પ્રમાણ ન્યૂયોર્ક મેટ્રોપોલિટન એરિયા, સેન ફ્રાન્સિસ્કો અને સેન હોઝેમાં નોંધાયું હતું.
રેડફિનનું કહેવું છે કે છેલ્લા ૧૦ વર્ષમાં આટલી મોટી સંખ્યામાં ક્યારેય ડીલ્સ કેન્સલ નથી થઈ. કંપનીના ઈકોનોમિક રિસર્ચ હેડ ચેન ઝાઓનું કહેવું છે કે વધારે પડતી કિમત અને વધતી જતી ઈન્વેન્ટરીને કારણે હોમબાયર્સ વધુ સિલેક્ટ બની ગયા હોવાથી ડીલ્સ કેન્સલ થવાનું પ્રમાણ વધી રહ્યું છે. તો બીજી તરફ બાયર્સ કરતા સેલર્સનું પ્રમાણ ૪૭ ટકા જેટલું વધી ગયું હોય તેવું છેલ્લા ૧૩ વર્ષમાં પહેલીવાર થયું છે
(9:59 AM IST)
છેલ્લા 8 દિવસમાં સૌથી લોકપ્રિય 
