રાજકોટ, તા. 31 જાન્યુઆરી : ગુજરાતમાં દારૂબંધીના કડક અમલ માટે કાર્યરત સ્ટેટ મોનિટરિંગ સેલ (SMC) એ સુરેન્દ્રનગર જિલ્લાના પાટડી તાલુકામાં પ્રોહિબિશનનો અત્યાર સુધીનો મોટો દરોડો પાડીને આંતરરાજ્ય દારૂના નેટવર્કનો પર્દાફાશ કર્યો છે. માલવણ ગામ પાસે આવેલી આલીશાન હોટલના પાર્કિંગમાં રાત્રિના સમયે ત્રાટકેલી પોલીસે કરોડોની કિંમતનો વિદેશી દારૂ ભરેલી ટ્રક ઝડપી પાડી છે.
દરોડાની વિગત અને મુદ્દામાલ
SMC ના પીએસઆઈ આર.જી. વસાવા અને તેમની ટીમને મળેલી સચોટ બાતમીના આધારે 30 જાન્યુઆરી, 2026 ના રોજ માલવણ ગામની આલીશાન હોટલના પાર્કિંગમાં દરોડો પાડવામાં આવ્યો હતો. તપાસ દરમિયાન એક ટ્રકમાંથી નીચે મુજબનો મુદ્દામાલ મળી આવ્યો હતો:
 * વિદેશી દારૂ (IMFL): કુલ 33,816 બોટલો, જેની કિંમત અંદાજે ₹1,50,48,800 થાય છે.
 * વાહન: ₹15,00,000 ની કિંમતની ટ્રક.
 * કેમોફ્લેજ મટીરિયલ: દારૂ છુપાવવા માટે વપરાયેલ ₹3,00,000 ના કિંમતી પ્લાયવુડ.
 * કુલ મુદ્દામાલ: રોકડ અને મોબાઈલ સહિત કુલ ₹1,68,53,800 નો જથ્થો જપ્ત કરાયો છે.
પોલીસ તપાસમાં બહાર આવ્યું છે કે આ દારૂનો જથ્થો હરિયાણાની ‘યુનાઈટેડ સ્પિરિટ્સ લિમિટેડ’ (કરનાલ) અને ‘ઓએસિસ કોમર્શિયલ પ્રાઈવેટ લિમિટેડ’ (અંબાલા) ડિસ્ટિલરીમાં બનાવવામાં આવ્યો હતો.
ઝડપાયેલ આરોપી અને વોન્ટેડ લિસ્ટ
પોલીસે સ્થળ પરથી ટ્રક ચલાવતા ડ્રાઈવર સતેન્દ્ર પાલ બલવીરસિંગ (રહે. ઓરૈયા, ઉત્તર પ્રદેશ) ને દબોચી લીધો છે અને તેને બજાણા પોલીસ મથકે સોંપવામાં આવ્યો છે. જોકે, આ દારૂ મંગાવનાર અને સપ્લાય કરનાર મુખ્ય ચાર આરોપીઓ હજુ પોલીસ પકડથી દૂર છે:
 * બિલ્કીસબાનુ હનીફખાન મલેક (રહે. ગેડીયા, પાટડી) - દારૂ મંગાવનાર.
 * ઈસ્માઈલખાન બિસ્મિલ્લાખાન મલેક (રહે. ગેડીયા, પાટડી) - દારૂ મંગાવનાર.
 * આકીબખાન ઇલમખાન મલેક (રહે. જેજરી, પાટડી).
 * પ્રીતમસિંગ (રહે. ઉદયપુર, રાજસ્થાન) - દારૂ સપ્લાય કરનાર.
કાયદેસરની કાર્યવાહી
આ મામલે બજાણા પોલીસ સ્ટેશનમાં પ્રોહિબિશન એક્ટની વિવિધ કલમો તેમજ ભારતીય ન્યાય સંહિતા (BNS-2023) ની કલમ 111 મુજબ ગુનો નોંધવામાં આવ્યો છે. SMC ની આ કાર્યવાહીથી સમગ્ર સુરેન્દ્રનગર જિલ્લાના બુટલેગરોમાં ફફડાટ ફેલાઈ ગયો છે. હાલ પોલીસ વોન્ટેડ આરોપીઓને ઝડપી પાડવા માટે ચક્રો ગતિમાન કર્યા છે.